Joylardagi mahalliy faollar boshchiligida rivojlanish

Loyihaning mahallalarni rivojlantirish bo‘yicha natijalari ko‘lami juda yuqori boʻldi. Hisob-kitoblarga ko‘ra, 170 ta mahallada amalga oshirilgan (yoki amalga oshirilayotgan) infratuzilmani takomillashtirish ishlari 700 mingdan ortiq aholiga manfaatli boʻladi. 

Biz to‘rtta maqsadli hududdagi barcha jamoalar tajribasini batafsil tavsiflay olmaymiz, shuning uchun tashabbus guruhlari faoliyati tufayli erishilgan sezilarli yutuqlarga bir nechta misol keltiramiz. 

Qoraqalpog‘istonning Taxiatosh tumanidagi Orol dengizining qurishi oqibatida katta zarar ko‘rgan “Yangi makon” mahallasida asosiy e’tibor aholining turmush sifatini yaxshilash uchun zarur bo‘lgan infratuzilmani takomillashtirishga qaratildi. Yangi obyektlar, jumladan, sport maydonchasi va kutubxona tashkil etishdan tashqari, mahallada ichimlik suvini to‘g‘ridan-to‘g‘ri xonadonlarga yetkazish uchun yangi suv quvurlari ham yotqizilmoqda.

Tashabbus guruhi rahbari Hayitboy Xalillayev ta’kidlaganidek, ishlarning muvaffaqiyati faqat aholi bilan doimiy muloqot tufayli yuzaga keldi. “Ishinchim komilki, mahalladagi ishonch faqat shaffoflikka asoslanadi. Agar har bir fuqaro aniq va to‘g‘ri ma’lumot olsa, bu yaxshi munosabatlarga zamin yaratadi,” – deb taʼkidladi u.

Navoiy viloyati Karmana tumanidagi Varq mahallasini ham yana bir ibratli misol sifatida koʻrsatish mumkin. “Aholining ko‘p yillik muammolari, talab va takliflarini hal etishda mahalla kengashi bilan birgalikda faol ish olib boryapman”, – deydi mahalla raisi Nurali Xoliqov. “Birgalikda biz umumiy maqsadga – jamiyatimiz uchun yanada farovon va munosib hayotni ta’minlashga intilamiz”.

To‘rtta tajriba hududida ishlab chiqilgan boshqa rivojlanish rejalarida bo‘lgani kabi, Varq mahallasi uchun maqsadlar mahalliy biznes va jamoatchilik rahbarlarining fikrlarini hisobga olgan holda shakllantirildi. Mahalladagi 256 ta xonadon uchun gaz tarmog‘i qayta qurilmoqda, ichimlik suvi uchun yangi quduq qazilmoqda, sport maydonchasi va bolalar bog‘chasi barpo etilmoqda. Shuningdek, bu yerda 95 ta eski ko‘cha chiroqlari almashtirildi, yangi kuzatuv kameralari va svetoforlar o‘rnatildi, piyodalar yo‘laklari yotqizildi, jamoat transporti yaxshilandi, yangi ijtimoiy infratuzilma obyektlari yaratildi. 

Tajriba hududlardagi koʻplab tumanlardagi kabi, Buxoro viloyatidagi “Kunjiqal’a” mahallasida ham, mahalla raisi Guliniso Izomova rahbarligida ana shunday ishlar amalga  oshirilmoqda. Bu qilingan ishlar natijasida aholining yashash sharoiti yaxshilandi, turmush darajasidagi farqlar qisqardi.

Jami 170 ta mahallada 168 ta yo‘l ta’mirlandi, 147 ta mahallada elektr tarmoqlari yaxshilandi. Shuningdek, 128 ta umumta’lim maktabi va 89 ta maktabgacha ta’lim muassasasi yangilandi yoki yangidan qurildi. Shu kabi yutuqlar jumlasiga qurilgan yangi sug‘orish tizimlari, piyodalar yo‘laklari, ko‘chalar va ko‘priklarni yoritish tizimini, shuningdek, “yashil” ish o‘rinlarini yaratishga investitsiya kiritilganligini misol qilish mumkin. Qishloq joylarda infratuzilmani rivojlantirish va turmush sharoitini yaxshilashga qaratilgan jami 895 ta kichik loyiha amalga oshirilmoqda.

Shu bilan birga, Qoraqalpog‘iston va Buxoro viloyatlaridagi mahallalar o‘zlari mustaqil ravishda jalb qilgan mablag‘lar hisobidan takomillashtirish ishlarini amalga oshirishga erishdi. O‘zbekistonning "Ochiq byudjet" davlat platformasi orqali moliyalashtirish olgan ko‘plab mahallalar o‘zlarining ijtimoiy infratuzilmasini yaxshiladi. Qoraqalpog‘istonda 10,5 km yo‘lga shag‘al-qum aralashmasi to‘kildi, yana 2,5 km yo‘l asfaltlandi. Elektr ta’minotini yaxshilash uchun transformator ham o‘rnatildi. Xuddi shunday, Buxoro viloyatida ham ushbu mablag‘lar hisobidan uchta mahallada 13,1 km yo‘l asfaltlandi. 

Bu yutuqlar aholi ko‘proq vakolatlarga va mustaqil moliyalashtirish imkoniyatiga ega bo‘lsa, ular hozirgi va kelajakdagi eng dolzarb muammolarni samarali hamda mustaqil ravishda hal qila olishini koʻrsatib beradi.