Bizning jamoa

Mamlakat jamoasi Oʻzbekiston xalqining barqaror, inklyuziv va yashil rivojlanishiga hissa qoʻshishga sodiq.

Akiko Fujii xonim

BMT Taraqqiyot Dasturining O‘zbekistondagi doimiy vakilasi

Akiko Fujii xonim 2024-yil iyul oyida Birlashgan Millatlar Tashkiloti Taraqqiyot dasturining (BMT Taraqqiyot Dasturi) O‘zbekistondagi doimiy vakilasi etib tayinlandi.

Fujii xonim BMT Taraqqiyot Dasturi tizimida yigirma besh yildan ko‘proq vaqt davomida ishlab kelmoqda: Maldiv orollaridagi doimiy vakil; Vyetnamdagi doimiy vakil o‘rinbosari, Fijidagi ko‘p mamlakatli idora (Fiji, Mikroneziya federal shtatlari, Kiribati, Marshall orollari, Nauru, Palau, Tonga, Tuvalu, Vanuatu uchun) va Yamayka; shuningdek Sudan, Tokio (BMT Taraqqiyot Dasturining Yaponiyadagi amaldagi vakolatxonasi) va Pokistondagi vakolatxonalarda turli lavozimlarda ishlagan.

Fujii xonim BMTning barqaror rivojlanish kun tartibiga qat’iy sodiqdir. Birlashgan Millatlar Tashkilotining yuqori darajadagi menejeri sifatida u iqlim o‘zgarishi tufayli yuzaga kelayotgan iqtisodiy va ijtimoiy masalalar bilan faol shug‘ullangan, inqirozli va mojaroli vaziyatlarda keng ko‘lamli gumanitar yordam missiyalarini boshqargan va barcha uchun adolatli hamda barqaror inson rivojlanishiga erishish tizimlari bo‘yicha maslahatlar bergan.

BMT Taraqqiyot Dasturida o‘z faoliyatini boshlashdan avval u rivojlanish sohasidagi turli tashkilotlarda, jumladan, bosh qarorgohi Venada (Avstriya) joylashgan Birlashgan Millatlar Tashkilotining Sanoatni rivojlantirish bo‘yicha tashkiloti (UNIDO) hamda Kiotodagi hamjamiyatlarni rivojlantirish masalalari bilan shug‘ullanadigan nodavlat tashkilotida ishlagan; talabalik davrida esa u 1995-yilda Kobedagi kuchli zilzila qurbonlariga yordam berish uchun ko‘ngilli bo‘lgan.

Fujii xonim Buyuk Britaniyaning Sasseks universitetida gender masalalari va rivojlanish, Yaponiyaning Kioto universitetida inson va atrof-muhit tadqiqotlari bo‘yicha magistrlik, shuningdek, Osaka xorijiy tadqiqotlar universiteti va Musasino san’at universiteti (Yaponiya) bakalavri darajalariga ega.

Akiko Fujii’ni X (Twitter) platformasida kuzatib boring: @AkikoFujii1

Janob Anas Fayyad Qarman

BMT Taraqqiyot Dasturining O‘zbekistondagi doimiy vakili o‘rinbosari

Anas Fayyad Qarman 2023-yil avgust oyida BMT Taraqqiyot Dasturining O‘zbekistondagi vakolatxonasida ish boshlab, o‘zining boy tajribasi bilan tashkilot faoliyatiga katta hissa qo‘shib kelmoqda. Bungacha 2019-yildan boshlab BMT Taraqqiyot Dasturining Serbiyadagi doimiy vakili o‘rinbosari lavozimida ishlagan. Serbiyada u BMT Taraqqiyot Dasturi doirasidagi dasturlarni ishlab chiqish, amalga oshirish va puxtalik bilan monitoringini yuritishni o‘z ichiga olgan sohalar to‘plamini boshqargan.

Janob Qarman BMTdagi 20 yildan ortiq vaqt davomidagi faoliyatini 2003-yilda, dastlab BMTning Qochqinlar bo‘yicha Oliy komissari boshqarmasining Iordaniyadagi milliy xodimi sifatida boshlagan. Bu lavozimda u Iroq va unga tutash hududlardagi mintaqaviy mojarolar natijasida yuzaga kelgan aholini ko‘chirishga tayyorlikni ta’minlash choralarini qo‘llab-quvvatlagan. Keyinchalik janob Qarman o‘z bilim va tajribasini BMTning bir qancha asosiy agentliklari, jumladan UNISEF, BMTning Gumanitar masalalarni muvofiqlashtirish boshqarmasi va BMTning Loyiha xizmatlari boshqarmasida qo‘lladi. 2011-yildan 2014-yilgacha u Iroq va Yamanda xizmat qilayotganda Ashraf lageri loyihasi doirasida muhim dasturlar va operatsiyalarni boshqargani e’tiborga molik. Janob Qarmanning xizmat faoliyati BMT Taraqqiyot Dasturining Iroq, Bangladesh va Quvaytdagi turli lavozimlardagi vazifalarni ham qamrab oldi.

BMT Taraqqiyot Dasturining O‘zbekistondagi doimiy vakili o‘rinbosari sifatidagi hozirgi vazifasida u xalqaro rivojlanish sohasidagi ijobiy o‘zgarishlarni ilgari surishda davom etdi. Janob Qarman Iordaniya Fan va texnologiyalar universitetining qishloq xo‘jaligi fanlari bo‘yicha diplomiga, shuningdek Nyu-York texnologiyalar institutining Inson resurslarini boshqarish diplomi va biznes boshqaruvi bo‘yicha magistr darajasiga ega.

Anas Fayyad Qarmanni X (Twitter) platformasida kuzatib boring: @AnasQarman