როგორ იწყება ექსპერიმენტული ბრენდი, რომელიც უკომპრომისოდ ცვლის ქართული მოდის ტენდენციებს? ბავშვობაში ნინო გოდერიძეს ხატვა და ხელსაქმე იტაცებდა. განსაკუთრებით ქსოვილის ფაქტურა და ფერები იზიდავდა. ეს ინტერესი წლებთან ერთად არ განელებულა, რამაც ქართული მოდის გამორჩეულ ბრენდს, God Era-ს ჩაუყარა საფუძველი. God Era გამბედავად არღვევს მოდის ინდუსტრიაში მიღებულ სტანდარტებს და იდენტობაზე, ტრავმასა და გარდაქმნაზე თამამად საუბრობს.

„ჩემი პირველი ინსპირაცია სხეული იყო, განსაკუთრებით კი ქვიარ ადამიანი და მისი თვითაღქმა“, -  გვიყვება ნინო. „ჩემს ნამუშევრებში ვცდილობ ვაჩვენო უმცირესობების გამოცდილება, სექსუალური ტრავმა, ის, რაზეც ჩვენ საზოგადოებაში ხშირად არ საუბრობენ“.

God Era 2020 წელს, პანდემიის დროს შეიქმნა. პანდემიით გამოწვეული კრიზისის პიკზე, ნინოს არც ტრადიციულ რესურსებზე, არც მენტორობის შესაძლებლობებზე მიუწვდებოდა ხელი. ამიტომ ორიგინალური ბრენდის შექმნა ექსპერიმენტული მიდგომების დანერგვით დაიწყო. კომბუჩადან ვეგანური ტყავის წარმოება მისი ერთ-ერთი პირველი და გამორჩეული პროექტია.

„ძალიან რთული იყო“, - იხსენებს ნინო. „საქართველოში მხოლოდ ერთი ადამიანი ვიპოვე, ვისაც მსგავსი გამოცდილება ჰქონდა,  და მასაც არ სჯეროდა ჩემი, თვლიდა რომ არ ვიცოდი, რას ვაკეთებდი“.

თუმცა, ხელების ჩამოყრის ნაცვლად, ნინომ გამოწვევა მიიღო და სასურველ შედეგსაც მიაღწია. „ამ მაგალითმა კიდევ უფრო გამაძლიერა! საკუთარი თავის რწმენა არ დამიკარგავს. საბოლოოდ, ორივე ამაყი ვიყავით იმით, რაც შევქმენით.“

იყო დამწყები დიზაინერი საქართველოში მარტივი საქმე არაა. მოდის ინდუსტრია მცირეა, სწავლისა და პრაქტიკული გამოცდილების მიღების შესაძლებლობები საკმაოდ შეზღუდულია. ხშირად, ახალგაზრდა დიზაინერები სტაჟირების გავლასაც კი ვერ ახერხებენ და პირველ კოლექციებს ექსპერიმენტულად ქმნიან. God Era-მაც ეს გზა გაიარა და თამამი ბრენდი პირადი რისკის ფასად წარადგინა. 

„გამბედაობა გჭირდება. შენით გიწევს ნულიდან დაწყება“, - ამბობს ნინო. „მისაბაძი მაგალითი არ გყავს,  საკუთარი სტილი უნდა აღმოაჩინო და კარიერის შენება დამოუკიდებლად დაიწყო“.

God Era მართლაც აღმოჩენების ბრენდია. მისი უნიკალურობა არა მხოლოდ გამორჩეულ ვიზუალურ ენაშია, არამედ ღირებულებებშიც, რომელსაც ბრენდის კონცეფცია ეფუძნება. ეთიკური წარმოება, უნისექსის ესთეტიკა, გადამუშავებული მასალების გამოყენება - ყველა ეს ელემენტი ერთად ქმნის საუკეთესო ეკოსისტემას ადამიანის პირადი ისტორიებისა და არაერთმნიშვნელოვანი გამოცდილების გადმოსაცემად.

„ყველა ნამუშევარს თავისი კონცეფცია აქვს. თითოეული ნამუშევარი კვლევისა და დაკვირვების შედეგია. ტრენდებს არ მივყვები“, - აცხადებს ნინო.

ნინოს ინსპირაციის წყარო ქალები არიან, განსაკუთრებით სოფლად მცხოვრები, ხელსაქმით დაკავებული ქალები, რომელთა ნამუშევრები ხშირად შეუმჩნეველი რჩება. კახეთში მოგზაურობისას, მან ნაბდის ქსოვის ტექნიკა შეისწავლა და ადგილობრივ ქალებთან ერთად გარკვეული ხანი იმუშავა.

„შესანიშნავი ქალები გავიცანი. ერთად შევქმენით ნამუშევრები. ეს მხოლოდ მოდა არ იყო, ეს აუნაზღაურებელი ყოველდღიური შრომაა. ამ ქალების სიძლიერე შთამბეჭდავია“, - გვიყვება  ნინო. 

„ჩემთვის ქალები ყვავილებს ჰგვანან. ტრადიციული გაგებით ნაზ და დეკორატიულს კი არა, ძლიერ, დამოუკიდებელ და შეუპოვარ ყვავილებს. ჩემი ყვავილების კოლექცია ასე დაიბადა.“

ნინოსთვის მოდა პოლიტიკური განაცხადია. მისი ეპატაჟური კოლექციები თავისი არსითა და ესთეტიკით ღრმად ეროვნულია და საქართველოს კულტურის მიმართ სიყვარულსა და პატივისცემას ეფუძნება. ეს კიდევ უფრო აფართოებს ამ უნიკალური არტისტის ასპარეზს და მეტ შესაძლებლობას ქმნის მოძველებული საზოგადოებრივი ნორმების წინააღმდეგ პროტესტის გამოხატვისთვის.

„ჩემს ნამუშევრებს ტაბუების დასამსხვრევად, გენდერის შესასწავლად და საზოგადოების პრობლემებზე შემოქმედებითად სასაუბროდ ვიყენებ.“

მხარდაჭერა წარმატებისთვის

ნინო გვიყვება, რომ მეწარმეთა სასწავლო პროგრამაში, „ფერად ბიზნესში“ მონაწილეობა მისთვის გარდამტეხი აღმოჩნდა. ეს საგანმანათლებლო ინიციატივა, რომელიც ნორვეგიის მთავრობისა და გაეროს განვითარების პროგრამის (UNDP) მხარდაჭერით ხორციელდება, მცირე მეწარმეთა ინტერესებს ითვალისწინებს და არა მხოლოდ ცოდნის, არამედ პრაქტიკული გამოცდილების მიღებისა და სასარგებლო კავშირების დამყარების შესაძლებლობაა.

„ასეთი მხარდაჭერა იშვიათია. შეგრძნება მქონდა, რომ პროგრამა ზუსტად ჩემზეა მორგებული“, - ამბობს ნინო.

დღეს God Era საერთაშორისო ყურადღებას იპყრობს. პირველივე კოლექციამ იაპონელი ბაიერების მოწონება დაიმსახურა. ქართული ბრენდი ყოველწლიურად მონაწილეობს საერთაშორისო ჩვენებებში საქართველოს საზღვრებს გარეთ. 

„ასეთ ინტერესს და მოთხოვნას ნამდვილად არ ველოდი. თავად დამიკავშირდნენ. ჩემთვის ეს ნიშანი იყო, რომ ავთენტურობა ყოველთვის ფასდება“, - აღნიშნავს ნინო.

გამოწვევიდან გადაწყვეტამდე

საერთაშორისო აღიარების მიუხედავად, ნინო მუდმივად ებრძვის გამოწვევებს, რომლებიც ტექნოლოგიებზე არასაკმარის წვდომას, ფინანსების სიმცირესა და საქართველოში მდგრადი და ინოვაციური მოდის სფეროში განათლებისა და ინფორმაციის ნაკლებობას უკავშირდება.

„ვიცი, რა მჭირდება, და ის, რასაც მოდის წამყვან საერთაშორისო სკოლებში ასწავლიან,“ ამბობს ნინო. „ახლა ჩემით ვსწავლობ. ასე იზრდება და ვითარდება ჩემი ბრენდი, God Era.“

God Era მხოლოდ ბრენდი როდია, ეს სამყაროს ხედვაა: ინკლუზიური, ეთიკური და თამამი. 

„უბრალოდ ტანსაცმელს არ ვქმნი. ვქმნი ისტორიებს, რომლებიც ჩემთან იწყება, სხვებთან გადადის და შემდეგ მთელ მსოფლიოში ვრცელდება. ეს დიზაინის ძალაა. ცხოვრებას დამოუკიდებლად აგრძელებს.“