LocationsEnergiya tejamkor sovitish orqali O‘zbekistonda iqlim chora-tadbirlari qo‘llab-quvvatlanmoqda
19-December, 2025
Guliston, 2025-yil 19-dekabr — Jamoat binolarida energiya samaradorligi va iqlimga chidamlilikni oshirish bo‘yicha olib borilayotgan ishlar doirasida ijtimoiy soha muassasalarining texnik xodimlari uchun havo sovitish va iqlimni boshqarish tizimlari bo‘yicha ixtisoslashtirilgan interaktiv trening o‘tkazildi.
Trening ishtirokchilarning quyidagi asosiy yo‘nalishlar bo‘yicha bilimlarini mustahkamlashga qaratildi:
- isitish va konditsionerlashtirish tizimlaridagi asosiy muammolar;
- sovituvchi moddalar xossalari va tabiiy sovituvchi moddalarni energiya tejamkor qo‘llash;
- konditsionerlashtirish tizimlarida sovitish sikllari va jarayonlari;
- iqlim tizimlarining loyihalanishi, ish sikllari va uskunalari;
- konditsionerlashtirishda qo‘llaniladigan sovituvchi moddalar va ularning atrof-muhitga ta’siri.
Mashg‘ulotlar davomida trener ko‘plab ijtimoiy obyektlar energiya samaradorligi talablari yetarli darajada hisobga olinmasdan qurilganini, bu esa ortiqcha energiya sarfiga olib kelayotganini ta’kidladi. Ishtirokchilar isitish, sovitish va shamollatish tizimlariga oid zamonaviy yondashuvlar, jumladan issiqlik nasoslari, chillerlar, split va markazlashtirilgan konditsionerlashtirish tizimlari, shuningdek binolarning issiqlik izolyatsiyasi, issiqlik yo‘qotishlari va energiya talabini kamaytirishdagi o‘rni bilan tanishdilar.
Trening doirasida yuqori global isish salohiyatiga ega an’anaviy sovituvchi moddalarning atrof-muhitga ta’siri ham ko‘rib chiqildi hamda ammiak kabi tabiiy sovituvchi moddalarga o‘tish tizimlar samaradorligini sezilarli darajada oshirishi va chiqindilarni kamaytirishi namoyish etildi. Amaliy misollar yaxshilangan izolyatsiya va zamonaviy HVAC texnologiyalari ekspluatatsiya xarajatlarini kamaytirish, yoqilg‘i sarfini qisqartirish hamda atrof-muhit va sog‘liq uchun salbiy ta’sirlarni kamaytirishga bir vaqtning o‘zida xizmat qilishini ko‘rsatdi.
Mazkur tashabbus jamoat binolarida energiya iste’molini kamaytirishga xizmat qiladi hamda O‘zbekistonning iqlim bo‘yicha chora-tadbirlari va dekarbonizatsiya maqsadlariga hissa qo‘shadi. Trening O‘zbekiston Respublikasi Iqtisodiyot va moliya vazirligi bilan hamkorlikda, Yaponiya hukumati moliyaviy ko‘magi asosida UNDP’ning Climate Promise tashabbusi doirasida amalga oshirildi. 2021-yildan buyon Yaponiya Climate Promise tashabbusiga 77 million AQSh dollaridan ortiq mablag‘ ajratib, UNDP’ga 28 ta mamlakat, mintaqa va hududlarda, jumladan O‘zbekistonda ham iqlim bo‘yicha chora-tadbirlar va barqarorlikni mustahkamlashni qo‘llab-quvvatlash imkonini berdi.
Loyiha haqida qo‘shimcha ma’lumot:
https://www.undp.org/uzbekistan/projects/promoting-innovative-decarbonization-solutions
