სამოქალაქო ჩართულობა

ახალი მიდგომების, მაგალითად მუნიციპალური გარდაქმნის პორტფელის დანერგვისას, ნებისმიერმა ქალაქმა საკმაოდ რთულ შეკითხვებს უნდა უპასუხოს. რამდენად ეფექტიანი იქნება მიმდინარე რეფორმა? რა გავაკეთოთ იმისთვის, რომ ადგილობრივმა მაცხოვრებლებმა არა მხოლოდ გაითავისონ მომავალი ცვლილებები, არამედ თავადაც აქტიურად ჩაერთონ რეფორმის განხორციელებაში? როგორ გავავრცელოთ ინფორმაცია ინოვაციებისა და სიახლეების შესახებ?

ამ შეკითხვებზე პასუხი სრულიად ნათელია - რეალური სამოქალაქო ჩართულობა ერთადერთი ქმედითი გზაა რეფორმის წარმატებისთვის.

ქუთაისში, სადაც სამოქალაქო საზოგადოება და ახალგაზრდობა გამორჩეულად აქტიურია, ეკოსმარტ ქალაქის ინიციატივის განხორციელება საჯარო და სამოქალაქო სექტორების თანამშრომლობას ეფუძნება.

იმერეთის მხარის მეცნიერთა კავშირი „სპექტრი“ ერთ-ერთი არასამთავრობო ორგანიზაციაა, რომელიც ჩართულია ეკოსმარტ კონცეფციის შემუშავებასა და დანერგვაში.

„ჩვენ აქტიურად ვმონაწილეობდით ეკოსმარტ ქალაქის ინიციატივის განხორციელებაში. დღეს, როდესაც პირველ შედეგებს ვაჯამებთ, ვხედავთ, რამდენად  მნიშვნელოვანია თოთოეული მოქალაქის ჩართულობა, მოსახლეობის საჭიროებების ცოდნა და შემდეგ იმ გადაწყვეტების ძიება, რომლებიც ისეთ გარემომდე მიგვიყვანს, რომელიც სასიამოვნო და მიმზიდველი იქნება ყველა მოქალაქისთვის“, - გვიყვება ქეთევან ცხაკაია, „სპექტრის“ აღმასრულებელი დირექტორი.

ქუთაისის მერიის ეკონომიკური განვითარებისა და ტრასპორტის განყოფილების ხელმძღვანელი, ირაკლი გოგლიჩიძის აზრით, პარტნიორობა და თანამშრომლობა აუცილებელია მედეგი, მდგრადი და მოსახლეობის ინტერესებზე ორიენტირებული ქალაქის შესაქმნელად. „ქუთაისის მრავალსექტორულმა ჯგუფმა, რომელიც მერის ხელმძღვანელობით შეიქმნა, გადაწყვიტა, დაგვეტესტა ისეთი იდეები, რომლებიც გამოხატავდა ქუთაისის მოსახლეობის საჭიროებებსა და ქალაქის მზაობას მომავლისთვის."

ექსპერტიზა, შემოქმედებითი მიდგომა და ახალი ხედვა - ქალაქის გარდაქმნას ეს ყველაფერი თანაბრად სჭირდება. ქუთაისის მერიისა და „სპექტრის“ თანამშრომლობის ერთ-ერთი შედეგი გამოყენებითი ეკოინოვაციების აკადემიის შექმნაა, სადაც ადგილობრივი ახალგაზრდები მდგრად ურბანულ განვითარებას სწავლობენ და თავადაც მონაწილეობენ მათი ქალაქისთვის საუკეთესო ხედვების შექმნაში. 2024 წლის გაზაფხულზე გამართულ იდეათონში 50-ზე მეტი ახალგაზრდა ინოვატორი ჩაერთო და ეკომეგობრული ურბანული განვითარების იდეები წარადგინა. 

„იდეათონი ძალიან საინტერესო გამოცდილებაა. ბევრი კრეატული და ინოვაციური კონცეფცია განვიხილეთ, რომელთა მიზანია ეკოლოგიურად სუფთა გარემოს შექმნა და ქუთაისის ტურისტული მიმზიდველობის გაზრდა. მაგალითად, ნარჩენების სეპარირების პროგრამები, ეკოჭკვიანი პარკის შექმნა და ეკოჭკვიანი ავტობუსების გაჩერებების განვითარება. კარგია, რომ ეს იდეები თანდათან ხორციელდება“, - ამბობს ქეთევან ცხაკაია.

ევროკავშირისა და UNDP-ის ხელშეწყობით, ქუთაისი თავის ახალ სახეს ქმნის და ამავდროულად საერთაშორისო გამოცდილებასა და პარტნიორობის შესაძლებლობებს იყენებს. ქალაქი აქტიურად თანამშრომლობს სხვა ურბანულ ცენტრებთან როგორც საქართველოში, ისე მოლდოვაში, ნეპალსა და სხვა ქვეყნებში, რაც ხელს უწყობს გამოცდილების გაცვლასა და საერთაშორისო პარტნიორობას.

დამატებითი ინფორმაცია:

„მერები ეკონომიკური ზრდისთვის“ (M4EG) ევროკაშირისა და გაეროს განვითარების პროგრამის (UNDP) ერთობლივი ინიციატივაა, რომელიც აღმოსავლეთ პარტნიორობის ქვეყნებში ხორციელდება. მისი მიზანია ქალაქებისა და დასახლებების მიმზიდველობის გაზრდა მაცხოვრებლებისა და ინვესტორებისთვის ცოდნის გაზიარების, რესურსების მოძიებისა და პარტნიორული ქსელის შექმნის მეშვეობით. 

M4EG პროგრამა გეოგრაფიულ თავისებურებებს ითვალისწინებს და ერთიან მიდგომებს იყენებს, რაც მრავალმხრივ მხარდაჭერას უზრუნველყოფს. პროგრამა ითვალისწინებს, რომ თანამედროვეობის კომპლექსური გამოწვევების სწრაფი მოგვარება საკმაოდ რთულია, თუმცა განათლებაში, ექსპერიმენტსა და თანამშრომლობაში ჩადებული ინვესტიციების გზით, ადგილობრივი მუნიციპალიტეტები რეალურ შანსს იძენენ, რომ მომავალს მომზადებულები შეხვდნენ.

დისქლეიმერი:

წინამდებარე ისტორია შექმნილია ევროკავშირისა (EU) და გაეროს განვითარების პროგრამის (UNDP) ხელშეწყობით, „მერები ეკონომიკური ზრდისთვის“ (M4EG)  პროგრამის ფარგლებში. გამოთქმული მოსაზრებები შესაძლოა არა ასახავდეს ევროკავშირისა და გაეროს განვითარების პროგრამის თვალსაზრისს.