Toshkent, O‘zbekiston – 2025 yil 25 sentyabr Yevropa Ittifoqi, Birlashgan Millatlar Tashkilotining Taraqqiyot Dasturi (BMTTD), O‘zbekiston Respublikasi Adliya vazirligi va Raqamli texnologiyalar vazirligi bilan birgalikda “O‘zbekistonda ma’lumotlarni boshqarishni baholash va jadallashtirish” mavzusida bir kunlik ko‘p tarmoqli seminar tashkil etdi. Tadbir Yevropa Ittifoqi tomonidan moliyalashtirilgan hamda BMTTD tomonidan amalga oshirilayotgan “O‘zbekistonda davlat xizmatlari ko‘rsatishni yanada takomillashtirish” loyihasi doirasida bo‘lib o‘tdi.

Unda davlat organlari, xususiy sektor, fuqarolik jamiyati tashkilotlari va akademik doira vakillaridan iborat 30 dan ortiq ishtirokchilar qatnashdi. Seminarda erishilgan natijalar tahlil qilindi hamda ma’lumotlarni boshqarish ekotizimini yanada mustahkamlash bo‘yicha keyingi qadamlar belgilandi. Tadbir davomida ma’lumotlar boshqaruvi tamoyillari va qonunchiligi, institutsional vazifalar va jarayonlar hamda ma’lumotlar infratuzilmasi va o‘zaro ishlash imkoniyatlariga bag‘ishlangan uchta tematik sessiya o‘tkazildi.

Yevropa Ittifoqining O‘zbekistondagi elchisi Toyvo Klaar janobi oliylari o‘z nutqida quyidagilarni ta’kidladi: “Samarali va shaffof ma’lumotlar boshqaruvi O‘zbekistonda ham, Yevropa Ittifoqida ham har bir kishi uchun dolzarb masaladir. Shu bois Yevropa Ittifoqi raqamlashtirish jarayonlarini jadallashtirish, boshqaruv tizimini mustahkamlash va O‘zbekistonda davlat xizmatlarining har bir fuqaro ehtiyojlariga mos, qulay, samarali va ochiq bo‘lishini ta’minlashga qaratilgan loyihani moliyalashtirmoqda. Bu, shuningdek, Yevropa Ittifoqining Global Gateway Strategiyasi maqsadlarini ham ifodalaydi. Mazkur strategiya ishonchli va barqaror raqamli bog‘liqlikni rivojlantirish orqali O‘zbekistonda xavfsiz, inklyuziv va fuqarolarga yo‘naltirilgan raqamli xizmatlarni shakllantirishga yordam beradi.”

BMTTDning O‘zbekistondagi Doimiy vakili o‘rinbosari janob Anas Fayyad Qarman o‘z nutqida raqamli transformatsiyada ma’lumotlarni boshqarishning naqadar muhimligiga alohida urg‘u berdi: “Ma’lumotlarni samarali boshqarish faqat texnik yoki huquqiy masala emas. Bu – ishonch, inklyuzivlik va insonlarning raqamli rivojlanish imkoniyatlaridan to‘liq foydalanishini ta’minlashdir. O‘zbekiston bu borada muhim natijalarga erishdi va biz mamlakatni xavfsiz, shaffof hamda insonlar ehtiyojiga yo‘naltirilgan ma’lumotlar ekotizimini yaratishda qo‘llab-quvvatlayotganimizdan faxrlanamiz.”

Muhokamalar davomida soha rivoji yo‘lida olib borilayotgan ishlarga baho berildi, huquqiy himoya va ijro mexanizmlaridagi bo‘shliqlar aniqlanib, bu boradagi imkoniyatlarni kengaytirish masalalari ko‘rib chiqildi. Ishtirokchilar Shaxsga doir ma’lumotlar to‘g‘risidagi qonunning qabul qilinishi, Adliya vazirligi huzuridagi Personallashtirish agentligining tashkil etilishi va O‘zbekistonning Ochiq ma’lumotlar portalidan foydalanishning oshib borayotganligi kabi qator yutuqlarni qayd etdilar. Shu bilan birga, muhokamalar davomida tizimlarning tarqoqligi, o‘zaro ishlashdagi qiyinchiliklar, hamda ayollar va qishloq aholisi orasida raqamli ko‘nikmalar yetishmovchiligi kabi muammolar ham muhokama qilindi. Seminar mamlakat bo‘ylab shaffoflik, innovatsiya va ma’lumotlarga asoslangan qaror qabul qilishni ta’minlaydigan yagona, inklyuziv va samarali ma’lumotlarni boshqarish tizimini ishlab chiqish bo‘yicha ochiq muloqot maydoniga aylandi.