Sirdaryo viloyati, 2026-yil 30-aprel - Birlashgan Millatlar Tashkilotining Taraqqiyot Dasturi (BMTTD) Iqtisodiyot va moliya vazirligi bilan hamkorlikda hamda Yaponiya hukumati moliyaviy ko‘magida Sirdaryo va Toshkent viloyatlarida beshta energiya samarador pilot obyektni rasman foydalanishga topshirdi. Mazkur obyektlar mahalliy hokimiyatlarga topshirilib, O‘zbekistonning dekarbonizatsiya va barqaror rivojlanish yo‘lidagi muhim qadamini ifodalaydi.

Tashabbus doirasida ijtimoiy muassasalarda propan asosidagi issiqlik nasoslari va zamonaviy konditsionerlar o‘rnatilib, eskirgan tizimlar almashtirildi hamda yiliga 482 tonna issiqxona gazlari chiqindilari kamaytirildi. Ushbu yangilanishlar butun mamlakat bo‘ylab kengaytirish mumkin bo‘lgan past uglerodli yechimlarni namoyish etadi.

“BMTTDning ‘Iqlim va’dasi’ tashabbusi orqali biz O‘zbekiston kabi mamlakatlarga majburiyatlarni amaliy natijalarga aylantirishda ko‘mak berishga sodiqmiz. Ushbu pilot obyektlar innovatsiya va hamkorlik past uglerodli kelajakka o‘tishni qanday tezlashtirishi mumkinligini ko‘rsatadi,” dedi Akiko Fujii xonim, BMT Taraqqiyot Dasturining O‘zbekistondagi doimiy vakilasi.

Energiya samaradorligini oshirish bo‘yicha ishlar allaqachon sezilarli natijalar berdi. 12 ming aholiga xizmat ko‘rsatuvchi oilaviy poliklinika energiya iste’molini ikki barobarga kamaytirib, samaradorlikni deyarli to‘rt barobar oshirdi. Umumiy sig‘imi 580 nafar bolaga mo‘ljallangan maktabgacha ta’lim muassasalari sovitish energiyasi sarfini kamida 15% ga, issiq suv iste’molini esa 3,5 barobardan ko‘proq kamaytirdi. 29-maktabda modernizatsiya natijasida energiya iste’moli 56% ga kamayishi va samaradorlik darajasi “D” dan “A” ga oshishi kutilmoqda.