მიმოხილვა

მონრეალის ოქმისა და ვენის კონვენციის ფარგლებში აღებული ვალდებულებების შესაბამისად, საქართველომ უკვე გადადგა ნაბიჯები ყველაზე საშიში ოზონდამშლელი ნივთიერებების - ქლორ-ფტორ-ნახშირბადებისა და წყალბად-ქლორ-ფტორ-ნახშირბადების მოხმარების შემცირების კუთხით. ქვეყანამ მიიღო ოზონდამშლელი ნივთიერებების შემცირების ორეტაპიანი სტრატეგია და მიზნად დაისახა ოზონდამშლელი ნივთიერებების მოხმარების შემცირება 67.5%-ით 2025 წლისთვის, და 97.5%-ით 2030 წლისთვის.

რას ვაკეთებთ

გაეროს განვითარების პროგრამა (UNDP), მონრეალის ოქმის მრავალმხრივი ფონდის დაფინანსებით, მხარს უჭერს საქართველოს ოზონდამშლელი ნივთიერებების ხმარებიდან ამოღების გეგმის შესრულებაში. მიმდინარე პროექტი სამი სტრატეგიული მიმართულებით ხორციელდება:

1. HCFC-ების მიწოდების, მოთხოვნის და ემისიების კონტროლი
2. HCFC-ების შეგროვება, გადამუშავება და აღდგენა, მათ შორის ვადაგასული სამაცივრო და კონდიცირების მოწყობილობებიდან
3. ბუნებრივი/დაბალი გლობალური დათბობის პოტენციალის მქონე მაცივარაგენტების გამოყენების წახალისება, მათ შორის, ფისკალური ინიციატივებისა და მავნე ნივთიერებების მოხმარებასთან დაკავშირებული ეროვნული კანონმდებლობის გადახედვის გზით.

შედეგები

• ამოქმედდა მაცივარაგენტების გამოყენების ელექტრონული ანგარიშგებისა და ნებართვების და სერვისის ტექნიკოსების ონლაინ სერტიფიკაციის სისტემები.
• გადამზადდა 400-ზე მეტი საბაჟო ოფიცერი, გარემოსდაცვითი ინსპექტორი და სამაცივრო ტექნიკოსი გარემოს დაცვის ახალი სტანდარტების საკითხებზე.
• გაუმჯობესდა სამაცივრო სექტორის მომსახურების ეკოლოგიური და უსაფრთხოების სტანდარტები.
• განახლდა პროფესიული განათლების პროგრამები კარგი სერვისის პრაქტიკის, ენერგოეფექტურობისა და გადამუშავების, აღდგენისა და ხელახლა მოხმარების ქსელის (RRR) პრინციპების პოპულარიზაციისთვის.
• შემუშავდა რეკომენდაციები მწვანე სახელმწიფო შესყიდვებისთვის (GPP), რომელიც გარემოსთვის უფრო მეგობრული სამაცივრო და კონდიცირების სისტემების შესყიდვას შეუწყობს ხელს.
• საბაჟო ოფიცრებსა და გარემოსდაცვით ინსპექტორებს გადაეცათ ახალი აღჭურვილობა: ჟონვის დეტექტორები, მაცივარაგენტების იდენტიფიკატორები და ტაბლეტები.