“Нарны Илч” төслийг 2024 онд БНФУ-ын Засгийн Газар, Байгаль орчин уур амьсгалын өөрчлөлтийн яам, Нийслэлийн Засаг Даргын Тамгын Газар, URECA ХХК, Гэр Өргөө ТББ-тай хамтран хэрэгжүүлсэн туршилтын төсөлд үндэслэн, өргөжүүлэн хэрэгжүүлэхээр болоод байна. Тус төслийн хүрээнд гэр хороолол дахь айл өрхүүдэд нарны цахилгаан үүсгүүрийн систем, цахилгаан халаагуур, дулаан хуримтлуур болох цогц шийдлийг туршилтын шугамаар нэвтрүүлсэн. Шинээр эхэлж буй төслийн хүрээнд тус шийдлийг өргөжүүлж, Чингэлтэй дүүргийн 100 өрхөөс эхлэн, ирэх дөрвөн жилийн хугацаанд нийтдээ 1000 өрхийг үе шаттайгаар нарны эрчим хүчинд шилжүүлэхээр зорьж байна. Мөн, ухаалаг тоолуур (smart meter)-г ашиглан дижитал байдлаар хүлэмжийн хийн ялгарлын бууралтыг хэмжих, тайлагнах ба баталгаажуулах (MRV) ажлуудыг гүйцэтгэж, хүлэмжийн хий ялгарлын хэмнэлтийг эргээд нүүрстөрөгчийн кредит болгон борлуулах боломжийг судлах ба энэ нь сэргээгдэх эрчим хүчинд чиглэсэн санхүүжилтийг татах, эрсдэлийг бууруулахад эерэг нөлөөтэй юм. 

Мөн, Монгол Улсын нарны эрчим хүчний дэд бүтцэд чиглэсэн хөрөнгө оруулалтыг нэмэгдүүлж, төр, хувийн хэвшлийн холимог санхүүжилтийг татах байдлаар хямд эрчим хүчний загварыг бий болгохоор зорьж байна. Төсөл нь нүүрстөрөгчийн кредитийн орлого, цахилгаан борлуулалт, шилжүүлсэн нүүрсний татаас зэрэг боломжит төсвийн урсгалыг судлах замаар нарны цахилгаан эрчим хүчний санхүүгийн тогтвортой байдлыг тодорхойлох юм. Түүнчлэн, бодлогын дэмжлэг, санхүүгийн урамшуулал олгох замаар сэргээгдэх эрчим хүчний шилжилтийг эрчимжүүлж, олон нийтийн мэдлэг, ойлголтыг нэмэгдүүлэн, зан байдалд өөрчлөлт бий болгохоор зорьж байна. 

Төслийн хүрээнд сэргээгдэх эрчим хүчний салбарт эмэгтэйчүүдийг чадавхжуулах, сургалтад хамруулах, ажлын байраар хангахад анхааран ажиллана. Хэрэгжилтийн эхний үе шатад Улаанбаатар хотын яндангүй бүст харьяалагдах айл өрхүүдийг хамруулахаар төлөвлөж байна.