БУУӨП жергиликтүү коомчулукка Жаратман Айымдар Жамаатарын түзүп, жабдуу алып берүүгө жана тандалган катышуучулар үчүн тренингдерди, мастер-класстарды уюштурууга көмөктөштү. Ар бир агымда негизинен туризм жана кол өнөрчүлүк менен алектенген 28 аялдан үч агым түзүлдү.

Коворкинг аянтчасы бардык керектүү техникалар менен жабдылган: ноутбуктар, кеңсе техникасы, проектор, экран жана мобилдүү эмеректер. Бул жер чыгармачылык жана окуу үчүн гана эмес, аялдар үчүн өз ара баарлашууга жана өзүн өзү ишке ашырууга коопсуз мейкиндик болуп калды. Бул жерде катышуучулар баа коюу, маркетинг, гендердик теңчилик, юридикалык укуктар, санариптик куралдарды колдонуу жана мүмкүн болгон иш берүүчүлөр менен байланыш түзүү боюнча билим алышат.

Акылыйма үчүн бул жамаат жаңы мүмкүнчүлүктөрдүн эшигин ачты. Бул жерде ал бизнес-план түзүп, колдоо таап, өзүнүн хоббиси толук кандуу ишке айлана аларына ишенди. Адегенде ага курбусу тигүүчү машиналарды таап берди. Андан кийин балдары Бишкектен керектүү жабдыктарды сатып беришти. Үйдүн бир бөлмөсүндө кичинекей ишкана ачылып, жаңы жашоо барагы башталды.

Ал жактан алган билимдер ага эсеп жүргүзүүнү, продукцияны реклама кылууну жана буйрутмалар менен иштөөнү үйрөнүүгө жардам берди. Азыр ал дагы үч айым менен бирге иштейт — алар дагы лабораториянын катышуучулары. Алар биргеликте этностилдеги буюмдарды — улуттук белдемчилерди, чыптамаларды, юбкаларды, жүк жапкычтарды жана декоративдүү жаздыктарды тигишет. Акылыйма идеядан баштап сатуучуга чейин бардык этаптарда өзү катышат.

“Азырынча ишкана деп атоого эрте, бирок ушул жумуштун аркасы менен чоң ишкана ачуу кыялым пайда болду”, — дейт ал.

Бүгүнкү күндө Акылыйма жаңы багытты да өнүктүрүүдө — заманбап кийимдер менен айкалыштырууга боло турган кыргыз орнаменттери түшүрүлгөн классикалык юбкаларды тиге баштады. Бул кийимдер өзгөчө мамлекеттик кызматкерлер арасында популярдуу болуп жатат. Ошондой эле ал лекало (кийимдин шаблону) чыгаруучу онлайн курстарды окуп бүтүп, тигүү сапатын дагы жакшыртты.