Кыргызстан

Башкаруу

БУУӨП Кыргызстандагы Туруктуу өкүлү Александра Соловьева

Айым Александра Соловьева 2023-жылдын августунда Бириккен Улуттар Уюмунун Өнүктүрүү программасынын (БУУӨП) Кыргыз Республикасындагы Туруктуу өкүлү кызматына киришкен. Анын БУУнун Азия жана Тынч океан, Европа жана башка аймактарындагы өлкөлөрдө, ошондой эле штаб-квартирада иштеген 25 жылдан ашык иш тажрыйбасы бар.

Буга чейин айым Соловьева 2019-жылдын апрелинен 2023-жылдын августуна чейин Беларусь Республикасында БУУӨПтүн туруктуу өкүлү болуп иштеген. Ал БУУӨПтүн өнүктүрүү багытындагы иштерин жетектеп, өлкөнүн Туруктуу өнүгүүнүн максаттарына жетишүүсүнө ар тараптуу колдоолорду көрсөткөн. Өзүнүн эл аралык тажрыйбасын жана билимин колдонуу менен айым Соловьева санариптик трансформацияны, “жашыл” экономикага өтүүнү, инклюзивдик жумуш орундарын түзүүнү, климаттык жана экологиялык ресурстарды башкарууну, гендердик теңчиликти жана саламаттыкты сактоо тутумун чыңдоону колдогон.

2018-2019-жылдары айым Соловьева Бонн шаарындагы Бириккен Улуттар Уюмунун Ыктыярчылар (UNV) Программасынын тышкы байланыштар жана коммуникациялар тармагын жетектеген, ал жерде UNV глобалдык күн тартиби боюнча негизги өнөктөштөргө Туруктуу өнүктүрүүнүн максаттарына жетүү үчүн ыктыярчылык иш боюнча кеңеш берген, ошондой эле мүчө мамлекеттер, өкмөттөр аралык жана өкмөттүк эмес уюмдар, каржы институттары, жарандык коом, илимий чөйрө, массалык маалымат каражаттары жана жеке сектор менен стратегиялык өнөктөштүктү жетектеген. 2014-жылдан бери айым Соловьева Бириккен Улуттар Уюмунун ыктыярчылар уюмунун ыктыярчылар инфраструктурасы, тынчтык, жаштар, базалык социалдык кызматтар жана коомчулуктун туруктуулугу боюнча беш глобалдык программасын жетектеген. Анын ичинде Африкадагы, Азия жана Тынч океан аймактарындагы, Латын Америкасындагы жана Кариб бассейниндеги аймактык кеңселерин жетектеген.

2011-2014-жылдары айым Соловьева Индия Республикасындагы БУУӨПтүн Туруктуу өкүлүнүн орун басары болуп иштеген. Ал өнүгүүнү колдоо жана улуттук дараметти чыңдоо боюнча кызматтарды көрсөткөн, саясат маселелери боюнча кеңештерди берген жана улуттук өнүгүүнүн артыкчылыктарын, анын ичинде башкарууну, адамдык өнүгүүнү, социалдык коргоону, жашоо-тиричиликти камсыздоону, кырсыктардын тобокелдигин азайтууну, ВИЧ, инклюзивдүүлүк жана башкаларды камтыган БУУнун жана БУУӨПтүн негизги документтерин даярдоону координациялаган.

2003-жылдан 2011-жылга чейин айым Соловьева БУУӨПтүн штаб-квартирасында бир нече кызматтарды ээлеген, анын ичинде Азия жана Тынч океаны боюнча Аймактык бюродо программалар боюнча адис жана башкаруу Бюросунда башкаруу боюнча адис болгон. Айым Соловьева өзүнүн эмгек карьерасын Лаосто БУУӨПтүн кичи гранттар программасынын координатору, ошол өлкөдөгү Бириккен Улуттар Уюмунун туруктуу Координаторунун кеңсесинин башчысы кызматтарынан баштаган, мындан сырткары БУУӨПтүн аймактардагы Ыктыярчысы болуп иштеген.

Айым Соловьева АКШнын Денвердеги Колорадо университетинин мамлекеттик башкаруу магистрдик даражасына, Москва мамлекеттик университетинин, Азия жана Африка өлкөлөрүнүн институтунун чыгыш таануу магистрдик даражасына, чыгыш таануу жана Африкалык изилдөөлөр бакалавр даражасына ээ. Орус, англис, француз, тай жана лаос тилдеринде эркин сүйлөйт. Айым Соловьева үй-бүлөлүү, эки баласы бар.
БУУӨП Кыргызстандагы Туруктуу өкүлүнүн орун басары - Патрик Хаверман

2025-жылдын август айында Хаверман мырза Кыргызстандагы Бириккен Улуттар Уюмунун Өнүктүрүү Программасынын (БУУӨП) Туруктуу өкүлүнүн орун басары болуп дайындалды. Анын БУУӨП системасында Латын Америкасы, Африка, Азия жана штаб-квартирада 25 жылдан ашык эл аралык тажрыйбасы бар.

2021-жылдан тартып Вьетнамда БУУӨПтүн Туруктуу өкүлүнүн орун басары болуп иштеген. Ал жерде туруктуу өнүгүү, климаттын өзгөрүшүнө каршы күрөшүү, башкаруу жана инклюзивдик өсүш багытындагы программаларды жетектеген.

2018–2020-жылдары Бангкокто өнөктөштүк боюнча регионалдык кеңешчи болуп эмгектенип, андан соң 2021-жылы БУУӨПтүн Ооганстандагы тышкы байланыштар жана өнөктөштүк бөлүмүн жетектеген.
2013–2018-жылдары Кытайдагы БУУӨП кеңсесинде өлкөлүк директордун орун басары болуп эмгектенген.

БУУӨПтүн Нью-Йорктогу штаб-квартирасында «Millennium Villages» долбоорунун жетекчиси болуп, Колумбия университетинин Жер институту менен тыгыз кызматташкан. Ошондой эле, LEAD программасынын алкагында Танзанияда стратегиялык операциялар боюнча орун басар болуп иштеп, Африканын 20дан ашык өлкөсүндө долбоорлорду ишке ашырууга колдоо көрсөткөн.

БУУӨПтөгү карьерасын Хаверман мырза 2000-жылы Гондураста баштаган. Ага чейин ал жеке сектордо Нидерландиядагы инженердик-архитектуралык компанияда каржы директору жана маркетинг боюнча менеджер болуп эмгектенген, ошондой эле Боливияда өнүктүрүү жаатындагы кызматташтык иштерине катышкан. Ал Роттердамдагы Эразм университетинде бизнес башкаруу боюнча билим алган. Хаверман мырза үйлөнгөн жана эки баланын атасы.