«Борбордук Азияда зордук-зомбулуктуу экстремизмдин алдын алуу үчүн жамааттардын туруктуулугун чыңдоо» аймактык демилгеси аркылуу БУУӨП жаштар борборлорунун жана коомдук платформалардын өсүп жаткан тармагына колдоо көрсөтүүдө. Бул платформалар жаш аялдар менен эркектер өз жөндөмдөрүн өнүктүрүп, социалдык байланыштарды түзүп жана жамааттарынын туруктуу өнүгүшүнө салым кошо ала турган коопсуз, инклюзивдүү мейкиндиктерди түзөт. Беш пилоттук муниципалитетте: Кадамжай, Ош, Кербен, Чолпон-Ата жана Александровкада (Миң-Булак) ишке ашырылып жаткан бул демилге жергиликтүү деңгээлде инклюзивдүү өнүгүүнү колдоо аркылуу жамааттардын туруктуулугун бекемдеп, социалдык биримдикти илгерилетет жана зордук-зомбулуктуу экстремизмдин алдын алуу боюнча улуттук потенциалды жогорулатат. 

Бул демилгенин ийгилиги Жапония Өкмөтү менен БУУӨПтүн ортосундагы бекем стратегиялык өнөктөштүктү чагылдырат. Үзгүлтүксүз жогорку деңгээлдеги консультациялар жана Жапониянын Элчилиги менен тыгыз кызматташуу аркылуу эки өнөктөш тең инвестициялар улуттук артыкчылыктарга шайкеш болушун жана жаштар менен жергиликтүү жамааттар үчүн туруктуу жыйынтыктарды алып келишин камсыз кылуу үчүн биргеликте иштешти. Youth of Osh уюмунун креативдүү хабынын ачылышы Кыргызстанда тынчтыкты, туруктуулукту жана адам коопсуздугун илгерилетүү боюнча бул биргелешкен милдеттенменин маанилүү этабын белгилейт. 

Жапониянын инвестициясы инфраструктура менен гана чектелбейт. Коопсуз жаштар мейкиндиктерин лидерликти өнүктүрүү, жарандык катышуу жана жергиликтүү жоопкерчиликти күчөтүү менен айкалыштыруу аркылуу бул демилге жаштардын тынчтыкка, туруктуулукка жана жамаатты өнүктүрүүгө активдүү салым кошуучулары болуусу үчүн туруктуу мүмкүнчүлүктөрдү түзөт. 

Ачылыш аземинде элчи Хирано Рюичи мырза мындай деп билдирди:

 "Бул (хаб) жаштарды коомдо активдүү роль ойноого, жергиликтүү чечимдерди кабыл алууга катышууга жана өз ара түшүнүшүүнү бекемдөөгө шыктандырып, Ош шаарынын андан да күчтүү, инклюзивдүү жана туруктуу келечегине салым кошот деп үмүттөнөбүз". 

Демилге тобокелдиктерди алдын алууга гана көңүл бурбастан, жаштардын мүмкүнчүлүктөрүн өнүктүрүүгө инвестиция салат. Ал жаштарды лидерлик, ишкердик, санариптик жана жарандык катышуу көндүмдөрү менен камсыздайт, ошол эле учурда жергиликтүү чечимдерди кабыл алууга жана жамаатты өнүктүрүүгө катышуу мүмкүнчүлүктөрүн түзөт. Ош шаарында эле 100дөн ашык жаш аялдар жана эркектер жаштардын лидерлиги, социалдык инновациялар, медиа сабаттуулук жана жарандык катышуу боюнча өз мүмкүнчүлүктөрүн бекемдеп, жергиликтүү муктаждыктарга жооп берген жаштардын демилгелерине негиз салышты. Бардык беш пилоттук муниципалитетте жаштар жергиликтүү чечимдерди иштеп чыгууда, мамлекеттик мекемелер менен диалогду бекемдөөдө жана инклюзивдүү башкарууга салым кошууда активдүү өнөктөш болуп жатышат. 

"Жапония Өкмөтү менен биздин өнөктөштүк туруктуу стратегиялык диалог жаштарга узак мөөнөттүү инвестиция салуу менен айкалышканда тынчтык жана туруктуулук үчүн кантип бекем негиз түзө аларын көрсөтөт. Биз биргеликте жаштарга өз ишин баштоого гана эмес, көндүмдөрдү өнүктүрүү, ишканаларды куруу жана жергиликтүү жамааттарга салым кошуу үчүн мүмкүнчүлүктөрдү берип жатабыз," — деди БУУӨПтүн Кыргызстандагы Туруктуу өкүлү Александра Соловьева.  

Демилгенин башкы жетишкендиги — Жапония Өкмөтүнүн, БУУӨПтүн жана өнүктүрүү боюнча өнөктөштөрдүн колдоосу менен түзүлгөн, жаштар жетектеген жандуу мейкиндик болгон Youth Hub креативдүү хабынын ачылышы. Хаб жаштарга заманбап санариптик инфраструктурага, ишкердикти колдоого жана идеяларды коомдук демилгелерге айландыра турган биргелешкен мейкиндиктерге жетүү мүмкүнчүлүгүн берет. Ал ошондой эле диалог, ыктыярчылык жана инновациялар үчүн платформа катары кызмат кылып, жаштардын, жергиликтүү бийликтердин жана жарандык коомдун ортосундагы кызматташтыкты бекемдеп, ишенимди жана социалдык биримдикти өнүктүрөт. 

Кыргыз Республикасын 2030-жылга чейин өнүктүрүүнүн Улуттук программасына, Мамлекеттик жаштар саясатынын концепциясына (2020–2030) жана БУУнун «Жаштар, тынчтык жана коопсуздук» күн тартибине (БУУнун Коопсуздук Кеңешинин №2250 резолюциясы) ылайык, бул демилге катышуу мүмкүнчүлүктөрүн кеңейтүү, жамааттар менен мамлекеттик мекемелердин ортосундагы ишенимди бекемдөө жана конфликттерге сезимтал жергиликтүү өнүгүүнү илгерилетүү аркылуу маргиналдашуунун түпкү себептерин чечет. Жаштарга өнүгүүдөгү өнөктөштөр катары инвестиция салуу менен, долбоор институттардын бекемделишине, жамааттардын ынтымагынын артышына жана туруктуулуктун жогорулашына салым кошот. 

Демилге жаштарга салынган стратегиялык инвестиция тынчтыктын узак мөөнөттүү дивиденддерин кантип алып келерин көрсөтөт. Жаштар борборлорунун тармагы кеңейген сайын, ал жаштардын укуктарын жана мүмкүнчүлүктөрүн кеңейтүүнүн масштабдуу улуттук моделине айланып, жаш аялдарга жана эркектерге инноватор, коомчулуктун лидерлери жана туруктуу өнүгүүнүн кыймылдаткыч күчү болууга мүмкүнчүлүк берүүдө. Узак мөөнөттүү өнөктөштүгү аркылуу Жапония Өкмөтү жана БУУӨП лидерлердин кийинки муунуна инвестиция салып — Адам коопсуздугун илгерилетүүдө, социалдык биримдикти бекемдөөдө жана Кыргызстан менен жалпы Борбордук Азия аймагы үчүн кыйла тынч, туруктуу жана гүлдөп-өнүккөн келечекти курууга жардам берүүдө.