წინამდებარე კვლევა შეისწავლის ტურიზმისა და სიჯანსაღის ანუ ველნესის სექტორებში არსებულ შრომის ბაზარს და ეყრდნობა  საქართველოს ხუთი რეგიონის 14 მუნიციპალიტეტში მოპოვებულ მონაცემებს (აჭარის ავტონომიური რესპუბლიკა, გურია, იმერეთი, კახეთი და რაჭა-ლეჩხუმი-ქვემო სვანეთი).

კვლევა განახორციელდა კვლევითი ორგანიზაციის „ეი-სი-თი“-ს მიერ საქართველოს განათლებისა და მეცნიერების სამინისტროსთან და პროფესიული უნარების სააგენტოსთან თანამშრომლობით ევროკავშირისა და გაეროს განვითარების პროგრამის დაკვეთით. 

ძირითადი მიგნებები:

• ქართველი დამსაქმებლები სამსახურის მაძიებელთა დაბალ კვალიფიკაციასა და არასაკმარის მოტივაციას დასაქმების ხელშემშლელ მიზეზებს შორის ასახელებენ. 
• დამსაქმებელთა უმეტესობა, 88 პროცენტი, პროფესიულ სასწავლებლებთან არ თანამშრომლობს, ხოლო 31 პროცენტი მსგავსი პარტნიორობის უპირატესობებსაც კი ვერ ხედავს. 
• დამსაქმებელთა მხოლოდ 24 პროცენტს აქვს გამოცდილება პროფესიულ საგანმანათლებლო დაწესებულებებთან თანამშრომლობის მხრივ, რაც უმეტესწილად სტუდენტების სტაჟირებასა და პრაქტიკული სწავლების შეთავაზებაში გამოიხატება.
• მცირე განსხვავებების მიუხედავად, ყველა რეგიონში  ყველაზე მოთხოვნადი პროფესიებია მომსახურების და გაყიდვების პერსონალის, ტექნიკოსების და დამხმარე სპეციალისტების პროფესიონალური ჯგუფები. 
• ტურიზმის სექტორში ყველაზე მოთხოვნადი პერსონალია მზარეულები (34%), მიმტანები (20%) და სასტუმროს მომსახურე პერსონალი (15%).