მაჭახელას დაცული ლანდშაფტი ბიომრავალფეროვნების კონსერვაციის, აღდგენისა და პასუხისმგებლიანი გამოყენების ხელშეწყობის მიზნით 2022 წლის სექტემბერში შეიქმნა. 4,294 ჰექტარზე გაშლილი ნაკრძალი მოიცავს მდინარე მაჭახელის ტერიტორიას, 9 სოფელსა და  სახელმწიფო ტყის ნაწილს და საკვანძო როლს ასრულებს ბუნების დაცვასა და ადგილობრივი თემების მდგრად განვითარებაში.

ჩეხეთის მთავრობის ფინანსური მხარდაჭერით, გაეროს განვითარების პროგრამა მუშაობს მაჭახელას დაცული ლანდშაფტის ხელმძღვანელობასთან, რათა გააძლიეროს ხელვაჩაურის მუნიციპალიტეტის დაგეგმარების შესაძლებლობები და დაცული ლანდშაფტის ადმინისტრირება. თანამშრომლობა მოიცავს მართვისა და საოპერაციო გეგმების შემუშავებას და საჭირო უნარების გამომუშავებას ამ გეგმების ეფექტური განხორციელებისთვის.

ინიციატივა ეფუძნება გაეროს განვითარების პროგრამის პროექტის „აჭარის დაცული ტერიტორიების მართვის გასაუმჯობესება“ შედეგებს და ჩეხეთისა და  გაეროს განვითარების პროგრამის თანამშრომლობას მდგრადი განვითარების მიზნებისთვის 2019-2021 წლებში.