კობერმის მიმდინარე, მეოთხე ეტაპი 2019 მაისში დაიწყო და სამი წელი გაგრძელდება. მისი განხორციელება 2010-2018 წლების მანძილზე დაგროვებულ გამოცდილებასა და გაკვეთილებს ეყრდნობა, ხოლო დაფინანსება 5,550,000 ევროს შეადგენს. აქედან 5,500,000 ევრო ევროკავშირის დაფინანსებაა, ხოლო 50,000 ევრო UNDP-ის თანადაფინანსებას წარმოადგენს.

ისევე როგორც წინა სამი ეტაპის შემთხვევაში, კობერმ-4 მიზნად ისახავს კონფლიქტის შედეგად გახლეჩილ თემებს შორის ურთიერთობისა და ნდობის აღდგენას და მშვიდობის, სტაბილურობისა და ადამიანების უსაფრთხოებისთვის ხელშემწყობი გარემოს შექმნას.

კობერმ-4-ის მიზნებია:

• კონფლიქტით დაზარალებულ ადამიანთა შორის ურთიერთობისა და ნდობის  აღდგენის ხელშეწყობა.
• მოქნილი მექანიზმის უზრუნველყოფა გამოვლენილი საჭიროებების დაკმაყოფილებისთვის.
• ურთიერთობის მექანიზმის შეთავაზება იმ საკითხებში, რომლებიც ორმხრივი ინტერესის საგანს  წარმოადგენს.

გარდა ამისა, კობერმ-4-ის ფარგლებში, ევროკავშირი (EU) და გაეროს განვითარების პროგრამა (UNDP) განსაკუთრებულ ყურადღებას უთმობენ ნდობის დამყარებისა და მშვიდობის მშენებლობის საქმეში ინოვაციური მიდგომის გამოყენებასა და ერთობლივი ინიციატივების განხორციელებას კონფლიქტის სხვადასხვა მახარეს მყოფი სამოქალაქო მოთამაშეების მონაწილეობით.

როგორც მოქნილი საგრანტო მექანიზმი, კობერმი მხარს უჭერს სამოქალაქო საზოგადოების ორგანიზაციების ინიციატივებს სხვადასხვა სფეროში, რომელთა შორისაა: ჯანმრთელობა, კულტურა, გარემოს დაცვა, ქალებისა და ახლაგაზრდების გაძლიერება, მშვიდობის მშენებლობა, უსაფრთხოება, და სხვა.

ევროკავშირი (EU) და გაეროს განვითარების პროგრამა (UNDP) ასევე ეხმარებიან კობერმის პარტნიორ სამოქალაქო ორგანიზაციებს მათი შესაძლებლობების გაუმჯობესებასა და ინსტიტუციურ განვითარებაში. ამ მიზნით, ტარდება ტრენინგი და კონსულტაციები, რომლებიც მორგებულია სამოქალაქო ორგანიზაციების საჭიროებებზე.