ცირკულარობა, როგორც ბიზნეს შესაძლებლობა

გარემოს დაცვის მსოფლიო დღის პროგრამა 5 ივნისს, ბათუმში, ცირკულარული ბიზნეს სამიტით დაგვირგვინდა.

ამ მასშტაბურმა ღონისძიებამ, რომელიც ევროკავშირის ხელშეწყობით გაიმართა, კერძო სექტორის, აკადემიური სფეროსა და საერთაშორისო ორგანიზაციების 100-მდე მონაწილე გააერთიანა. სამიტის ორგანიზატორი იყო განვითარების რეგიონული ორგანიზაცია, CENN. ღონისძიებას მხარი დაუჭირეს ადგილობრივმა და საერთაშორისო პარტნიორებმა, მათ შორის, გაეროს განვითარების პროგრამამ.

სამიტის მონაწილეებმა ცირკულარული ეკონომიკის პერსპექტივებსა და გამოწვევებზე იმსჯელეს. მათ აღნიშნეს, რომ ცირკულარობის ხელშემწყობი საკანონმდებლო ველის შექმნის მიუხედავად, საქართველოს ცირკულარობის მაჩვენებელი კვლავ საგრძნობლად ჩამორჩება ევროკავშირის წევრი ქვეყნების ცირკულარობის საშუალო მაჩვენებელს: 1.48% საქართველოში და 12.2% ევროკავშირში. საქართველოში, მასალების გამოყენების მოდელი კვლავ წრფივია: „აიღე - დაამზადე - გამოიყენე - გადაყარე“, ხოლო ნარჩენების 88%, გადამუშავებისა და ხელახლა გამოყენების ნაცვლად, ნაგავსაყრელებზე ხვდება.

ეს მონაცემები როგორც არსებული გამოწვევის, ისე გამოუყენებელი შესაძლებლობების მასშტაბზე მიუთითებს. ცირკულარობის განვითარებით საქართველო შეძლებს უფრო ეფექტიანად დაიცვას გარემო და მნიშვნელოვანი ეკონომიკური სარგებელიც მიიღოს.

ბიზნეს სამიტზე გამართული მსჯელობა ასევე შეეხო ცირკულარული ეკონომიკის განვითარებისთვის მნიშვნელოვან მიმართულებებს, მათ შორის გადამუშავების ტექნოლოგიებს, საქართველოში პლასტიკის შეფუთვის მომავალს, მწარმოებლის გაფართოებული ვალდებულების სისტემის განვითარებას, ელექტრონული ნარჩენების მართვას ბლოქჩეინი ტექნოლოგიით და ხელოვნური ინტელექტის გავლენას ცირკულარულ პროცესებზე.

„ევროკავშირი სიამაყით უჭერს მხარს საქართველოს გადასვლას ცირკულარულ ეკონომიკაზე, რაც სასიკეთოა როგორც ადამიანისთვის, ისე გარემოსთვის. მდგრადი ეკონომიკური ზრდა ნარჩენების მართვის სისტემების გაძლიერებას, გადამუშავების დანერგვასა და რესურსების ეფექტიან გამოყენებას ეფუძნება,  ხოლო კერძო სექტორს საკვანძო როლი ენიჭება ამ პროცესის წარმატებაში“, - განაცხადა ანელის ვანვიმელბეკემ, მწვანე შეთანხმების, კავშირის, ეკონომიკისა და ინვესტირების გეგმის საკითხებში საქართველოში ევროკავშირის წარმომადგენლობის გუნდის ხელმძღვანელმა.

„ცირკულარობა დიდი ხანია გასცდა მხოლოდ გარემოს დაცვის დღის წესრიგს. დღეს ეს ბიზნეს შესაძლებლობაა. კომპანიები, რომლებიც წარმოების ნარჩენს ამცირებენ, რესურსებს ეფექტიანად იყენებენ და ინოვაციურ ბიზნეს-მოდელებს ნერგავენ, მომავალში მეტად კონკურენტუნარიანები იქნებიან და უფრო სწრაფად გაიზრდებიან. გაეროს განვითარების პროგრამა მზადაა დაეხმაროს ქართულ ბიზნესს ამ გარდაქმნის გზაზე“, - აღნიშნა ნილს ქრისტენსენმა, UNDP-ის მუდმივი წარმომადგენლის მოადგილემ საქართველოში.

ადამიანისა და პლანეტისთვის

გარემოს დაცვის მსოფლიო დღემ ხაზი გაუსვა პარტნიორობის, ინოვაციისა და ადგილობრივი ინიციატივების მნიშვნელობას მწვანე და მდგრადი მომავლისთვის. გაეროს განვითარების პროგრამამ (UNDP) კიდევ ერთხელ დაადასტურა, რომ თავისი ექსპერტიზის, რესურსებისა და თანამშრომლობის ქსელის მეშვეობით, გააგრძელებს მწვანე გადაწყვეტების დანერგვას, ცირკულარული ეკონომიკის ხელშეწყობას და მწვანე და სამართლიანი გადასვლის მხარდაჭერას.

გარემოს დაცვის მსოფლიო დღე

2026 წელს, გარემოს დაცვის დღის მთავარი თემა კლიმატის ცვლილების მზარდი გამოწვევაა, #NowForClimate. ჩვენი პლანეტა განგაშის სიგნალებს გვიგზავნის და სასწრაფო პასუხს ელოდება. მწვანე და უსაფრთხო მომავალი ჯერ კიდევ შესაძლებელია, თუ დაუყოვნებლივ ვიმოქმედებთ, განახლებადი ენერგიის გამოყენებასა და ეკოსისტემების აღდგენაზე ვიზრუნებთ და ეკონომიკის ცირკულარულ მოდელებს დავნერგავთ.

ევროკავშირის შესახებ

ევროკავშირისა და საქართველოს მჭიდრო პარტნიორული ურთიერთობა 30 წელზე მეტს ითვლის. საქართველოს განვითარების ხელშეწყობას ევროკავშირი სხვადასხვა გზით ახორციელებს, მათ შორის ფინანსური მხარდაჭერით, ცოდნის, გამოცდილებისა და ექსპერტიზის გაზიარებითა და ინოვაციების ხელშეწყობით. ევროკავშირის მჭიდრო თანამშრომლობა ქართველ ხალხთან მშვიდობის, თავისუფლების, დემოკრატიის, ადამიანის უფლებებისა და ინკლუზიური ეკონომიკური ზრდის საერთო ღირებულებებს ეფუძნება. მეტი ინფორმაცია საქართველოს მიმართ ევროკავშირის მხარდაჭერის შესახებ იხილეთ EU4Georgia ვებგვერდზე.

ცირკულარული ეკონომიკის ხელშეწყობა 

„მწვანე და ინკლუზიური ცირკულარული ეკონომიკა: ნარჩენების შემცირება და გადამუშავება მოქალაქეთა ჯანმრთელობისთვის“ გაეროს ერთობლივი პროგრამაა, რომელიც ევროკავშირის დაფინანსებით ხორციელდება. მას საერთაშორისო ორგანიზაციების კონსორციუმი უძღვება, გაეროს სააგენტოებისა და ავსტრიის გარემოს დაცვის სააგენტოს შემადგენლობით. ორწლიანი პროგრამის (2025-2027) ბიუჯეტი 4.4 მილიონ ევროს შეადგენს. მისი მიზანია ადგილობრივი და საერთაშორისო პარტნიორებისა და კერძო სექტორის თანამშრომლობის მხარდაჭერა და გრძელვადიანი ცვლილების მიღწევა ცირკულარული ეკონომიკის ასაშენებლად.

მწვანე და სამართლიანი გადასვლა

„მწვანე მომავალი, უფლებები და სტაბილურობა“ UNDP-ის რეგიონული პროექტია, რომელიც დანიის მთავრობის დაფინანსებით, საქართველოსა და მოლდოვას რესპუბლიკაში ხორციელდება. სამწლიანი ინიციატივა (2024-2027), რომლის მთლიანი ბიუჯეტი ორივე ქვეყნისთვის თითქმის 11 მილიონ აშშ დოლარს შეადგენს, მიზნად ისახავს მწვანე და სამართლიანი გადასვლის ხელშეწყობას გარემოსდაცვითი მმართველობის გაძლიერების, მწვანე ეკონომიკის მშენებლობის, ტერიტორიაზე დაფუძნებული ინკლუზიური განვითარების, ადგილობრივი გადაწყვეტების მხარდაჭერისა და სამოქალაქო ჩართულობის გზით.

საკონტაქტო ინფორმაცია

• სოფო ჭიჭინაძე, UNDP, +995 599 196907, sophie.tchitchinadze@undp.org
• თეიკო კანდელაკი, UNDP, +995 599 103525, tinatin.kandelaki@undp.org 
• ირა სულავა, UNDP, +995 599 579105, irine.sulava@undp.org
• თამარ მიქაძე, ევროკავშირის წარმომადგენლობა საქართველოში, +995 32 2364364, tamriko.mikadze@eeas.europa.eu