LocationsУлаанбаатар хот цэвэр эрчим хүчний шилжилтийг ахиулах олон талт хэлэлцүүлгийг зохион байгууллаа
November 25, 2025
Улаанбаатар, 2025 оны 11-р сарын 25 – Улаанбаатар хотын захиргаа, НҮБ-ын Хөгжлийн хөтөлбөр хамтран “Улаанбаатар хотын цэвэр эрчим хүчний шилжилт” сэдэвт олон талт оролцогчдын хэлэлцүүлгийг зохион байгуулж цэвэр эрчим хүчний шилжилтийн боломж, шийдлүүдийн талаар санал солилцов.
Улаанбаатар хот агаарын бохирдол, эрчим хүчнээс хамааралтай ядуурал, уур амьсгалын эмзэг байдал зэрэг асуудлуудтай тулгарсаар байна. Хотын дулаан, цахилгаан эрчим хүч нь нүүрснээс хамааралтай хэвээр бөгөөд авто тээврийн хэрэгслийн утаа нэмэгдсээр байна. Гэсэн хэдий ч Монгол Улсын нар, салхины арвин нөөц нь эрчим хүчний шилжилтийг хурдасгах боломжийг олгож байна.
“Улаанбаатар хотын цэвэр эрчим хүчний шилжилт” хэлэлцүүлэгт засгийн газар, судалгаа шинжилгээний байгууллага, хөгжлийн түншүүд, иргэний нийгэм, болон иргэдийн төлөөлөл зэрэг 100 гаруй төлөөлөл оролцож санал солилцон, цэвэр эрчим хүчинд суурилсан шийдлүүд, сайн туршлагуудыг өргөжүүлэх боломжийг хэлэлцэв.
Нийслэлийн Засаг дарга бөгөөд Улаанбаатар хотын Захирагчийн нийгмийн бодлогын асуудал хариуцсан зөвлөх Б.Сэмжидмаа: "Цаашид бид илүү олон өрхийг сэргээгдэх эрчим хүчний халаалтын шийдэлд холбохын зэрэгцээ Улаанбаатар хотын ногоон шилжилтийг түргэтгэхийн тулд хамтын ажиллагааг өргөжүүлэх болно." хэмээн дурдав.
Нийслэлийн Засаг дарга бөгөөд Улаанбаатар хотын Захирагчийн нийгмийн бодлогын асуудал хариуцсан зөвлөх, Б.Сэмжидмаа
Хэлэлцүүлэг хоёр үндсэн чиглэлээр өрнөсөн нь сэргээгдэх эрчим хүчээр дулаан хангамжийг шийдэх болон цахилгаан тээврийн хэрэгслийг дэмжих тухай байв. Олон талын төлөөлөл болсон оролцогчид тус тусын байр суурь, туршлагаа хуваалцаж, зөвлөмжүүдээ илэрхийлсэн ба цэвэр эрчим хүчний шилжилтийг ахиулах хүчин чармайлтад оруулах хувь нэмрээ гүнзгийрүүлнэ гэдгээ бататгасан юм.
Монгол дахь НҮБ-ын Хөгжлийн хөтөлбөрийн Суурин төлөөлөгч Матилда Димовска: “Өнөөдрийн хэлэлцүүлэг бол Монгол Улсын цэвэр эрчим хүчний шилжилтийг урагшлуулах бидний нийтлэг зорилтын илэрхийлэл юм. Энэ зорилтод хүрэхийн тулд инновац, хамтын ажиллагаа, хүртээмжтэй байдлыг хангах шаардлагатай. Цэвэр эрчим хүчний шилжилт нь хүн төвтэй, хүртээмжтэй, хэнийг ч орхигдуулахгүй байх зарчмаар хэрэгжих ёстой” хэмээн онцлов.
Монгол дахь НҮБХХ-ийн Суурин төлөөлөгч Матилда Димовска
НҮБ-ын Хөгжлийн хөтөлбөрийн тухай
НҮБХХ нь ядуурал, тэгш бус байдал болон уур амьсгалын өөрчлөлтөөс үүдэлтэй шударга бус байдлыг эцэслэх зорилго бүхий Нэгдсэн үндэстний байгууллагын тэргүүлэх агентлаг юм. Дэлхийн 170 орны түншлэгчид болон мэргэжилтнүүдийн өргөн цар хүрээт хамтын ажиллагааны дүнд эх дэлхий, хүн бүрийн төлөө хөгжлийн урт хугацааны, цогц шийдлийг бий болгоход улс үндэстнүүдийг дэмжин ажилладаг. Дэлгэрэнгүйг undp.org/mongolia эсвэл @UNDPMongolia хаягаар авна уу.
Дэлгэрэнгүй мэдээллийг дараах хаягаар авна уу.
Б. Хулан, НҮБ-ын Хөгжлийн хөтөлбөрийн Мэдээлэл харилцаа хариуцсан эксперт, khulan.bayarsaikhan@undp.org
