Хамтын ажиллагааны хүрээнд Ногоон хотын шалгуур үзүүлэлтийг Улаанбаатар хотын хөгжлийн ерөнхий төлөвлөгөө, нийслэлийн Засаг даргын үйл ажиллагааны хөтөлбөр, жилийн төлөвлөгөөтэй уялдуулан боловсруулна. Мөн ногоон дэд бүтцэд төр, хувийн хэвшлийн хамтарсан санхүүжилтийг өргөжүүлэх, үүний дотор ил тод, хариуцлагатай нүүрстөрөгчийн зах зээлээр дамжуулан санхүүжилт татах боломжийг судлахад дэмжлэг үзүүлнэ. 

НҮБХХ-ийн Монгол дахь Суурин төлөөлөгч Лионел Лорон хэлэхдээ: “Эрчимтэй хотжилтын нөлөөгөөр Улаанбаатар хотын дэд бүтэц, суурь үйлчилгээ урьд өмнө байгаагүй их ачаалалтай тулгарч байна. НҮБ-ын Хөгжлийн хөтөлбөр Засгийн газар болон Нийслэлийн засаг даргын тамгын газартай хамтран иргэдийн хэрэгцээ, оролцоонд тулгуурласан, үр дүнтэй шийдлүүдийг тодорхойлон хэрэгжүүлэх болно. Бидний хамтын ажиллагаа ногоон хот төлөвлөлт, төсөвлөлтийг дэмжих, төр-хувийн хэвшлийн түншлэлийг бэхжүүлэх, мөн хотын хөгжлийн тэргүүлэх зорилтуудыг хэрэгжүүлэх, тэр дундаа ногоон эрчим хүчний шилжилтийг хурдасгах, нүүрстөрөгчийн зах зээлийн боломжуудыг хөгжүүлэхэд чиглэнэ”. 

Энэ хамтын ажиллагаа НҮБХХ-ийн дэмжлэгтэйгээр хэрэгжиж буй хоёр төсөлд түшиглэнэ. Эдгээр нь Даян дэлхийн байгаль орчны сангийн санхүүжилтээр НҮБХХ, Монгол Улсын Засгийн газар хамтран хэрэгжүүлж буй “Ногоон, хүртээмжтэй хотууд” төсөл, “Гэр хорооллын сэргээгдэх эрчим хүчний шилжилтийг дэмжих замаар иргэдийн амьжиргааг дээшлүүлэх” төсөл юм. Уг хоёр төсөл уур амьсгалын өөрчлөлтөд тэсвэртэй, байгальд ээлтэй хотын хөгжил, гэр хороололд цэвэр эрчим хүчний шийдэл нэвтрүүлэх, хотын тогтвортой хөрөнгө оруулалтыг дэмжихэд хувь нэмэр оруулна.