Ил тод, хариуцлагатай төсвийн төлөвлөлт, хяналтыг хэрэгжүүлэхэд залуусын оролцоог дэмжиж байна

March 27, 2024
НҮБХХ

Улаанбаатар, 2024 оны 3 сарын 27 – Үр дүнд суурилсан төлөвлөлт, төсөвлөлт, хяналтын талаар залуусыг чадавхжуулах, улмаар ил тод, хариуцлагатай байдлыг төлөвшүүлэхэд өөрсдийн дуу хоолойг хүргэхэд сэдэлжүүлэх YOUTH IDEATHON 2024 уралдаант хөтөлбөрт Нийслэл, орон нутгийн төрийн байгууллага, их дээд сургууль, хувийн хэвшил, төрийн бус байгууллага, залуусын сайн дурын нэгдэл зэрэг салбар салбарын төлөөллөөс бүрдсэн 56 багийн нийт 180 гаруй залуус идэвхтэй оролцлоо. Тус уралдааныг Европын Холбооны санхүүжилттэй, НҮБ-ын Хөгжлийн хөтөлбөрийн “Монгол Улсад Тогтвортой хөгжлийн зорилготой уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төслийн зүгээс санаачлан, YOUTHinc.mn - Монгол Залуу Мэргэжилтнүүдийн Нийгэмлэгтэй хамтран зохион байгууллаа.

Нэг сарын хугацаанд үргэлжилсэн энэхүү хөтөлбөрийг гурван шатны сонгон шалгаруулалттай, оролцоот, шинэлэг байдлаар зохион байгуулсан ба эхний шатанд шалгарсан багуудыг чадавхжуулах сургалтад хамруулж, төсвийн төлөвлөлт, хяналттай холбоотой салбар бүрийн ментор зөвлөхүүд багуудыг удирдан чиглүүлж, улмаар эцсийн шатанд шалгарсан 8 баг өнөөдөр төсвийн төлөвлөлт, гүйцэтгэлд хяналт тавихад тулгамдаж буй асуудлуудыг шийдэхэд залуусын оролцоо ямар байх талаар өөрсдийн судалгаа, төслийн санааг танилцууллаа.  

Үр дүнд суурилсан төсөвлөлт, хяналтыг нэвтрүүлэх нь төсвийн хөрөнгийг ил тод, үр ашигтай, хариуцлагатай зарцуулахад чухал нөлөө үзүүлдэг. Тиймээс Монголын нийт хүн амын гуравны нэг хэсгийг бүрдүүлж буй залуучуудыг энэ чиглэлээр бүтээлч шийдэл, шинэлэг санаа санаачилга гаргахад дэмжлэг үзүүлэх нь нийгмийн өөрчлөлт, эдийн засгийн өсөлт, инновацын түүчээ болох залуусаар манлайлуулан тогтвортой хөгжлийг урагшлуулахад нэн ач холбогдолтой юм. 

Эцсийн шатны сонгон шалгаруулалтыг үр дүнтэй, ил тод, шударга явуулахад онцгой хувь нэмэр оруулсан шүүгчдийн бүрэлдэхүүнд Үндэсний аудитын газар, Сангийн яам, Төсвийн тогтвортой байдлын зөвлөл, Европын Холбоо болон НҮБ-ын Хөгжлийн хөтөлбөрийн төлөөлөл орж ажиллаа. “YOUTH IDEATHON 2024” уралдааны шилдэг 8 багийн залуус төслөө тун өрсөлдөөнтэй, сонирхолтой байдлаар амжилттай танилцуулж улмаар дараах багууд шилдгээр шалгарлаа: 

  • Тэргүүн байр: “Яасан бэ” баг (Сайн дурын бүлэглэл) Төсвийн гүйцэтгэлд үнэлгээ өгдөг цэсийг E-Mongolia вэб платформд оруулах замаар төсвийн хяналтад иргэдийн оролцоог нэмэгдүүлэх төсөл  
  • Дэд байр: “Dream high” баг (Монгол Улсын Их Сургууль) Төсөвтэй холбоотой асуулт, мэдээллийг гар утасны месежээр залуучуудад хүргэж, тэдний оролцоо, ойлголтыг сайжруулах төсөл 
  • Гутгаар байр: “Хүсэл” баг (Шинжлэх ухаан, технологийн их сургууль) Төсвийн тухай ойлголт мэдлэгийг тоглоомон аппликэйшнээр дамжуулж олон нийтэд хүргэж, төсвийг хянахад иргэдийн оролцоог нэмэгдүүлэх төсөл 

Европын Холбооны Төлөөлөгчийн газрын Хамтын ажиллагааны багийн ахлагч Адриен Мүрг хөтөлбөрийн оролцогчдод баяр хүргэж, Залуучууд улс орны ирээдүйг тодорхойлоход чухал үүрэг гүйцэтгэдэг. Тийм ч учраас хүн ам зүйн онцлог бүхий Монгол Улсад Европын Холбооны явуулж буй үйл ажиллагааны цөм хэсэг нь залуучуудыг дэмжихэд чиглэдэг. Нэн ялангуяа ил тод, хариуцлагатай байдлыг эрхэмлэсэн сайн засаглалыг дэмжихэд залуучуудыг татан оролцуулах, соён гэгээрүүлэхэд анхааран ажилладаг хэмээн онцлон хэлэв.   

***

Европын Холбооны тухай  

Европын Холбоо бол Европ тивийн 27 тусгаар улсын эдийн засаг, улс төрийн нэгдэл юм. Тус Холбоо нь хүний эрхэм чанар, эрх чөлөө, ардчилал, эрх тэгш байдал, хууль дээдлэх ёс, хүний эрхийг түүний дотор цөөнхийн эрхийг дээдлэх үндсэн үнэт зүйлс дээр тулгуурлан байгуулагджээ. Өнөө цагт Европын Холбоо нь даян дэлхийн хүн бүрд хүртээмжтэй, нийгэм, эдийн засаг, байгаль орчны тогтвортой хөгжлийг дэмжсэн үйл ажиллагаа явуулж байна.

НҮБХХ-ийн тухай 

НҮБХХ нь ядуурал, тэгш бус байдал болон уур амьсгалын өөрчлөлтөөс үүдэлтэй шударга бус байдлыг эцэслэх зорилго бүхий Нэгдсэн Үндэстний Байгууллагын тэргүүлэх агентлаг юм. Дэлхийн 170 орны түншлэгчид болон мэргэжилтнүүдийн өргөн цар хүрээт хамтын ажиллагааны дүнд эх дэлхий, хүн бүрийн төлөө хөгжлийн урт хугацааны, цогц шийдлийг бий болгоход улс үндэстнүүдийг дэмжин ажилладаг. Дэлгэрэнгүйг undp.org/mongolia эсвэл @UNDPMongolia хаягаар авна уу. 

Нэмэлт мэдээллийг:  

Х.Отгонгэрэл, Төслийн мэдээлэл, харилцаа хариуцсан мэргэжилтэн (otgongerel.khalzanbanid@undp.org)  

НҮБХХ