Иш-чара Кыргыз Республикасынын Башкы прокуратурасы жана БУУӨП тарабынан Финляндиянын Тышкы иштер министрлигинин каржылык колдоосу менен ишке ашырылып жаткан «Адилеттүүлүккө жетүү» долбоорунун алкагында уюштурулду. Тренинг БУУӨП менен Кыргыз Республикасынын Судьялар ассоциациясынын 2023–2024-жылдардагы биргелешкен демилгесинин жыйынтыктарына негизделген. Анын алкагында базалык изилдөө жүргүзүлүп, судьялар, прокурорлор жана адвокаттар үчүн окутуулар өткөрүлгөн, ошондой эле Жогорку сотко экологиялык иштер боюнча Пленумдун материалдарын даярдоодо эксперттик колдоо көрсөтүлгөн. 

Тренингдин программасы экологиялык мыйзамдардын жана Кыргызстандын эл аралык милдеттенмелеринин негизги маселелерин, климаттык күн тартибин, зыянды аныктоо жана баалоо боюнча укук колдонуу практикасын, жер казынасын пайдалануу чөйрөсүндөгү прокурордук көзөмөлдү, ошондой эле экологиялык талаш-тартыштарды сотто кароо тартибин камтыды. Тренер жана эксперт катары Башкы прокуратуранын, Жогорку соттун, Жаратылыш ресурстары министрлигинин, Судьялар ассоциациясынын жана Адвокаттарды окутуу борборунун адистери чакырылды. 

“Кыргыз Республикасынын Башкы прокуратурасынын алдында экологиялык прокуратураларды түзүү бул багыттагы көзөмөл системасын өркүндөтүүдөгү маанилүү кадам болуп саналат. Экологиялык прокуратуралардын кызматкерлеринин алдында жооптуу милдеттер турат. Бул милдеттер мыйзамдарды терең билүүнү гана эмес, аларды иш жүзүндө колдоно билүүнү, ыйгарым укуктуу мамлекеттик органдар менен натыйжалуу өз ара аракеттенүүнү жана сот инстанцияларында өз позициясын коргой билүүнү талап кылат”, — деп белгиледи Кыргыз Республикасынын Башкы прокуратурасынын Мамлекеттик бийлик жана жергиликтүү өз алдынча башкаруу органдарынын мыйзамдарды аткаруусун көзөмөлдөө башкармалыгынын башчысы Инзилбек Абралиев.  

«Жаратылышты коргоо прокуратурасынын түзүлүшү – Кыргызстанда экологиялык адилеттүүлүктү бекемдөөдөгү маанилүү кадам. Бул жаратылышты коргоо гана эмес, бул – адамдарды коргоо: таза суу, дени сак жамааттар, жаратылыш ресурстарын жоопкерчиликтүү пайдалануу жана экологиялык мыйзамдардын адилет жана натыйжалуу колдонулушун камсыздоо. Бүгүнкү тренинг БУУӨП, Судьялар ассоциациясы, Жогорку сот, Башкы прокуратура жана Жаратылыш ресурстары министрлиги менен көп жылдык кызматташтыктын натыйжасы болуп саналат», - деди БУУӨПтүн Кыргыз Республикасындагы Туруктуу өкүлүнүн орун басары Патрик Хаверман. 

14-августта ушундай эле тренинг Ош шаарында өткөрүлөт. Эки иш-чара биригип, жаратылышты коргоо прокуратурасынын бардык 22 кызматкерин, ошондой эле аймактык прокуратура органдарынын прокурорлорун жана айлана-чөйрөнү коргоо боюнча ыйгарым укуктуу органдын өкүлдөрүн камтыйт. 

Долбоор жөнүндө 

БУУӨПтүн «Адилеттүүлүккө жетүү» долбоору Кыргыз Республикасында Финляндиянын Тышкы иштер министрлигинин каржылык колдоосу менен ишке ашырылууда. Долбоор Кыргыз Республикасынын 2030-жылга чейинки Улуттук өнүктүрүү программасына ылайык, мыйзам үстөмдүгүн бекемдөөгө, жарандардын сот адилеттигине жетүүсүн кеңейтүүгө жана юстиция институттарынын кесиптик потенциалын өнүктүрүүгө көмөктөшөт.