LocationsМурда медициналык-социалдык эксперттик комиссиядан (МСЭК) өткөндөн кийин Темирбек Курманбаев кагаз түрүндөгү маалымкат алып, аны керек болгон учурда көрсөтүү үчүн сактап жүрүүгө мажбур болчу. Азыр болсо документ санарип форматында жеткиликтүү.
Маалымкат дайыма колдо: МСЭКтин санариптештирилиши майыптык тууралуу документке жеткиликтүүлүктү жеңилдетти
2026-ж., 14-September
Темирбек Курманбаев
БУУӨП Кыргызсан
Мурда медициналык-социалдык эксперттик комиссиядан (МСЭК) өткөндөн кийин Темирбек Курманбаев кагаз түрүндөгү маалымкат алып, аны керек болгон учурда көрсөтүү үчүн сактап жүрүүгө мажбур болчу. Азыр болсо документ санарип форматында жеткиликтүү.
«Мен үчүн эң чоң ыңгайлуулук, маалымкат дайыма телефонумда болот. Мурда маалымкатты жоготуп алам деп чочулачумун, азыр болсо баары телефонумда», – дейт Темирбек.
Бишкек шаарынын тургуну 2021-жылдан бери медициналык-социалдык эксперттик комиссиядан кайра күбөлөндүрүүдөн өтүп келет. Оорусунун күчөшүнө байланыштуу ага майыптыкты тариздеп, статусун жыл сайын ырастап туруу зарыл болгон.
Темирбектин айтымында, МСЭКтен өтүү тартиби мурдагыдай эле өзгөрүүсүз калды жана медициналык текшерүүнү, ошондой эле адистердин бетме-бет кароосун камтыйт. Өзгөргөн нерсе жыйынтыкты тариздөө жана алуу жолу болду: эми маалымкат санарип форматында жеткиликтүү.
«Кагаз маалымкатты адатта эки-үч күндөн кийин беришчү. Азыр болсо тиркемеде ал кийинки күнү эле көрүнөт», – деп белгилейт ал.
МСЭКтин санариптештирилиши жарандарды күбөлөндүрүүгө жөнөтүү процессин онлайн форматка өткөрүүгө, жолдомолорду багыттоону автоматташтырууга жана документтерге электрондук кол коюуну камсыз кылууга мүмкүндүк берди. Күбөлөндүрүүнүн жыйынтыктары жарандар үчүн «Түндүк» мобилдик тиркемеси аркылуу жеткиликтүү. Ошондой эле система Майыптыгы бар адамдардын бирдиктүү реестрин жүргүзүүнү камсыздап, медициналык уюмдар менен МСЭКтин ортосунда кагаз документтерди өткөрүп берүү практикасын жоюу аркылуу процесстин ачыктыгын жогорулатат.
Акыркы жылдары БУУӨП Өкмөткө 2028-жылга чейинки Улуттук санариптик стратегияны ишке ашырууда колдоо көрсөтүп келет. Бул колдоо санариптик көндүмдөрдү өнүктүрүүнү, IT-башкарууну чыңдоону жана мекемелер аралык кызматташууну кеңейтүүнү камтыйт.
БУУнун Кыргызстан Республикасындагы Туруктуу координаторунун жетекчилиги алдында ДССУ, БУУӨП, ЮНФПА жана ЮНИСЕФ тарабынан ишке ашырылып, Европа Биримдигинин колдоосу менен БУУнун ТӨМ Фонду аркылуу каржыланган Биргелешкен программа Кыргызстандын санариптик саламаттык сактоо тутумун чыңдоого багытталган.
