Бишкек, 17-апрель 2025 — Кыргызстан жаңы мөмө-жемиштер жана жашылчалар сектору үчүн GLOBALG.A.P. 6 версиясынын стандарты үчүн Улуттук интерпретациялык документти (УИД) бекитти — бул экспорттук потенциалды кеңейтүү жана эл аралык рыноктордо ата мекендик продукциянын позициясын бекемдөө аракеттериндеги олуттуу жетишкендик болуп саналат.

GLOBALG.A.P. Секретариаты тарабынан Кыргызстандын расмий УИДнин бекитилиши Финляндия Өкмөтү тарабынан каржыланган «Соодага көмөк көрсөтүү» долбоорунун алкагында БУУӨПтүн техникалык жардамы менен Кыргыз Республикасынын Суу ресурстар, айыл чарба жана кайра иштетүү өнөр жай министрлигинин, бизнес өкүлдөрүнүн, тармактык ассоциациялардын жана эл аралык эксперттердин биргелешкен ишинин натыйжасы болду.

УИДнин кабыл алынышы Кыргыз Республикасын 2026-жылга чейин өнүктүрүүнүн Улуттук программасын жана Кыргыз Республикасынын Президентинин «Кыргыз Республикасынын агроөнөр жай комплексин андан ары өнүктүрүү боюнча чаралар жөнүндө» Жарлыгын ишке ашыруудагы маанилүү кадам болуп саналат , алар агроөнөр жай комплексин модернизациялоо жана эл аралык талаптарга жооп берген агроөнөр жай комплексин өндүрүүнүн жана эл аралык талаптарга жооп берген ата мекендик айыл чарба продукциясынын атаандаштыкка жөндөмдүүлүгүн жана экспорттук потенциалын жогорулатууга багытталган.

«GLOBALG.A.P. үчүн Улуттук интерпретациялоо документин иштеп чыгуу жана бекитүү — бул биздин Кыргызстандын айыл чарба продукциясынын эл аралык рынокко чыгышы үчүн жагымдуу шарттарды түзүү боюнча максаттуу ишибиздин натыйжасы. Бул документ айыл чарба өндүрүүчүлөрүнүн сапат стандарттарын жана атаандаштыкка жөндөмдүүлүгүн жогорулатууга жардам бере турган маанилүү инструмент болуп саналат. Министрлик Кыргызстандын жогорку сапаттагы продукциясын өнүктүрүү боюнча өнөктөштөрдүн колдоосу менен айыл чарба продукциясын чет өлкөгө чыгуу иштерин колдоону улантат», - деп белгиледи Кыргыз Республикасынын Министрлер Кабинетинин Төрагасынын орун басары – Суу чарба, айыл чарба жана кайра иштетүү өнөр жай министри Бакыт Төрөбаев.

УИД GLOBALG.A.P. эл аралык стандартын Кыргызстандын агроклиматтык, технологиялык жана ченемдик шарттарына ылайыкташтырат. Талаптарды локалдаштыруу стандартты фермерлер жана экспорттоочулар үчүн түшүнүктүү жана колдонууга ыңгайлуу кылат, бул Кыргызстандын айыл чарба продукциясынын эл аралык рынокторго жеткиликтүүлүгүн кеңейтүүчү туруктуу айыл чарба практикасын ишке ашырууга көмөктөшөт.

«Бул документтин кабыл алынышы Кыргызстандын айыл чарба өндүрүүчүлөрүн эл аралык рынокторго интеграциялоодо маанилүү кадам болуп саналат, ал кыйла кирешелүү сегменттерге жана туруктуу экономикалык өсүштү камсыз кылат, натыйжалуу кошумча нарк чынжырчасын түзүүгө мүмкүндүк берет. БУУӨП заманбап, атаандаштыкка жөндөмдүү агроөнөр жай комплексин өнүктүрүүдө Кыргызстанга колдоо көрсөтүүнү улантат», - деп белгиледи БУУӨПтүн Кыргызстандагы туруктуу өкүлү Александра Соловьева.

Продукциянын сапаты жана коопсуздугунун эл аралык стандарттарына өтүүнү колдоо кыргызстандык өндүрүүчүлөргө чет элдик өнөктөштөрдүн ишенимин жана экспорттук продукциянын атаандаштыкка жөндөмдүүлүгүн жогорулатууга мүмкүндүк берет. Өзгөчө баалуу нерсе, ылайыкташтырылган документ дыйкандар үчүн талаптарды ачык-айкын көрсөтүп, аларды практикалык ишке ашырууга көмөктөшөт.

БУУӨП Кыргызстандагы мамлекеттик органдарды, бизнести жана айыл чарба өндүрүүчүлөрүн дүйнөлүк жеткирүү чынжырларына интеграциялоо жана айыл чарбасын туруктуу өнүктүрүү жолунда колдоону улантат.