Бириккен Улуттар Уюмунун Өнүктүрүү программасы (БУУӨП) Кыргыз Республикасынын Экономика жана коммерция министрлигине караштуу «Кыргыз Экспорт» Экспортту өнүктүрүү жана илгерилетүү борбору менен биргеликте жыл сайын өткөрүлүүчү жалпы улуттук маалыматтык-окутуу кампаниясын — «Экспорт  кербени 2026» баштайт.

Өткөрүлө турган күндөрү: 2026-жылдын 1–13-февралы          

Региондор: Баткен, Ош, Манас (Жалал-Абад облусу), Талас, Каракол жана Балыкчы (Ысык-Көл облусу), Нарын

«Экспорт кербени 2026» региондордогу микро, кичи жана орто ишканаларды тышкы рынокторго чыгууга даярдоого багытталган. Кампания экспорт боюнча практикалык, кадам-кадам сунуштарды берип, улуттук эксперттерге жана экспортту колдоо институттарына түз жеткиликтүүлүктү камсыз кылат. Иш-чара Кыргыз Республикасынын бардык аймактарында экспортко даяр компаниялардын туруктуу базасын түзүүгө багытталган.

Катышуучуларды эмне күтөт?

Ар бир бир күндүк офлайн семинар экспорттук чынжырдын бардык негизги этаптарын камтыйт, анын ичинде:

• экспорттун логикасын түшүнүү: продукт – рынок – стандарттар – ветеринардык жана фитосанитардык талаптар – логистика – финансы;

• экспорттук жана бажы жол-жоболору;

• стандартташтыруу жана техникалык жөнгө салуу;

• соода аналитикасы жана рынокторду изилдөө куралдары;

• Кыргызстандагы логистика жана жеткирүү чынжырлары;

• экспортту каржылоо мүмкүнчүлүктөрү жана финансылык инструменттер.

Сабактарды «Кыргыз Экспорт», БУУӨП, Кыргызстандарт, ветеринардык жана фитосанитардык кызматтардын эксперттери, ошондой эле каржы институттарынын өкүлдөрү өткөрүшөт.

Кимдер үчүн?

• айыл чарба жана айыл чарба эмес продукцияны өндүрүүчүлөр жана кайра иштетүүчүлөр;

• экспортко кызыккан микро, кичи жана орто ишканалар;

• экспорт боюнча практикалык билим алууну каалаган бардык региондордогу ишкерлер.

Эмне үчүн катышуу маанилүү?

• экспортко байланыштуу реалдуу суроолорго практикалык жооп алуу;

• улуттук эксперттер жана мамлекеттик институттар менен түз байланыш түзүү;

• продукцияны тышкы рынокторго даярдоону үйрөнүү;

• логистика, сертификаттоо жана каржылоо мүмкүнчүлүктөрү менен таанышуу;

• бизнестин экспорттук даярдыгын жана атаандаштыкка жөндөмдүүлүгүн жогорулатуу.

«Экспорт Караваны 2026» БУУӨП эксперттик жана уюштуруучулук колдоосу менен ишке ашырылып, «Кыргызстанда жасалган» Улуттук экспортту өнүктүрүү программасынын (2025–2028) жана соода жол-жоболорун жөнөкөйлөтүү демилгелеринин максаттарына салым кошот.