Жаңа жұмысқа орналасу әрдайым ерекше кезең. Жаңа адамдар, бейтаныс жүйелер, жұмыс істеудің жаңа тәсілдері және көңілде жүрген сан түрлі сұрақтар қатар жүреді.

Мені не күтіп тұр? Бұл, сірә, әрбір жаңа қызметкердің ойына келетін алғашқы сұрақтардың бірі.

Алғашқы жұмыс күні жаңа қызметкердің кәсіби ортасының бір бөлігіне айналатын адамдармен – команда мүшелерімен, жетекшілерімен және түрлі қолдау қызметтерінің өкілдерімен танысудан басталады. Әдетте команданың бір мүшесі болатын әріптес кеңсені аралатып көрсетіп, жаңа ортаға тезірек бейімделуге көмектеседі. Қызметкердің жұмыс үстелінде брендтелген термостақан, дәптер және басқа да пайдалы заттардан тұратын құттықтау жиынтығы күтіп тұрады. Бір қарағанда бұл ұсақ-түйек болып көрінуі мүмкін, бірақ жаңа есімдер мен ақпаратқа толы алғашқы күні мұндай ықылас белгісі жаңа жұмыс орнын әлдеқайда жайлы әрі жылы қабылдауға көмектеседі.

БҰҰДБ Қазақстанның екі қаласында кеңсесі бар ірі ұйым, сондай-ақ әртүрлі өңірлерде жұмыс істейтін қызметкерлері де бар. Сондықтан әріптестер жаңа қызметкерлермен жақынырақ таныса алуы үшін біз ішкі корпоративтік желіде олардың өмірбаяны қамтылған қарсы алу хабарламасын жариялаймыз.

Персоналды басқару мамандары ретінде біздің басты міндеттеріміздің бірі – бейімделу үдерісін барынша жеңіл әрі жайлы ету. Біз алғашқы жұмыс күндерінің жылы қарсы алуға толы, мазмұнды әрі шабыттандыратын кезең болғанын қалаймыз. Мұндағы мақсат – жаңа әріптестерге ұйымды, оның миссиясы мен көзқарасын таныстыру, командасының бір бөлшегі екенін сезіндіру және олардың кәсіби жолын жігерленіп, қолдау сезініп әрі табысты жұмысқа қажет негізгі ақпаратпен қаруланып бастауына көмектесу.