პარიზის შეთანხმების ფარგლებში, საქართველომ ამბიციური ვალდებულებები აიღო - ემისიების შემცირება 35 პროცენტით 2030 წლისთვის 1990 წლის საბაზისო მაჩვენებელთან შედარებით, რაც საკმაოდ კარგ პერსპექტივას აძლევს ქვეყანას ნახშირბადით ვაჭრობის მსოფლიო ბაზარზე შესასვლელად.

ამ მხრივ, შვეიცარია და იაპონია საქართველოს მხარდამჭერები და სავარაუდოდ, პირველი სავაჭრო პარტნიორებიც არიან. გაეროს განვითარების პროგრამასთან/UNDP თანამშრომლობით, შვეიცარიის ეკონომიკური ურთიერთობების სახელმწიფო სამდივნომ/SECO ნახშირბადით ვაჭრობისთვის საქართველოს მზაობა შეაფასა, არსებული საკანონმდებლო თუ სხვა სახის ხარვეზები გამოავლინა და ტექნიკური დახმარების პაკეტი შეიმუშავა.

2021 და 2022 წელს, საქართველომ ხელი მოაწერა ნახშირბადით ვაჭრობის შესახებ შეთანხმებებს შვეიცარიასა და იაპონიასთან, რომლებიც ძალაში შევა მას შემდეგ, რაც საქართველო მოსამზადებელ სამუშაოებს დაასრულებს და სრულად მზად იქნება შესაბამისი ტრანზაქციების შესასრულებლად.

ნახშირბადით ვაჭრობის შედეგად მიღებული დაფინანსებით, საქართველო შეძლებს წარმატებით შეასრულოს კლიმატის ცვლილების შერბილებასთან და ადაპტაციასთან დაკავშირებული მიზნები და მნიშვნელოვანი ნაბიჯები გადადგას კლიმატგონივრული განვითარების გზაზე.

ნახშირბადის ბაზარი

ნახშირბადის ბაზარი და ემისიებით ვაჭრობის სისტემები საერთაშორისო თანამშრომლობის მექანიზმია, რომლის გამოყენებით შესაძლებელია ემისიების ტრანსფერი, გაყიდვა ან ყიდვა ქვეყნებსა თუ კომერციულ კომპანიებს შორის. მსგავსი საბაზრო მექანიზმების გამოყენება ასევე დაშვებულია პარიზის შეთანხმებით, მე-6 მუხლის ფარგლებში.

იმისთვის, რომ ქვეყანა ან კომპანია ნახშირბადით ვაჭრობის ბაზარს შეუერთდეს,  მის მიერ წარმოდგენილი ემისიების შემცირება ან ემისიების სრული ამოღება დადასტურებული უნდა სპეციალური მეთოდოლოგიის გამოყენებითა და სრული გამჭვირვალობის დაცვით. გარდა ამისა, ნახშირბადის ტრანზაქციების განხორციელება მოითხოვს შესაბამისი ინსტიტუციური და ფინანსური მექანიზმების, ისევე როგორც სოციალური და გარემოსდაცვითი მონიტორინგის სისტემის არსებობას.

ნახშირბადის ბაზრების შესახებ მეტი ინფორმაცია ხელმისაწვდომია UNDP-ის ვებგვერდზე  Climate Promise.

საკონტაქტო ინფორმაცია:

• ნანა ჩინჩილაკაშვილი, საქართველოს გარემოს დაცვისა და სოფლის მეურნეობის სამინისტრო, +995 599 502619, nana.chinchilakashvili@mepa.gov.ge
• სოფო ჭიჭინაძე, UNDP, +995 599 196907, sophie.tchitchinadze@undp.org
• ირა სულავა, UNDP, +995 599 579105, irine.sulava@undp.org