Улаанбаатар, 2026 оны 8 дугаар сарын 20. Монгол Улс НҮБ-ын Цөлжилттэй тэмцэх конвенцийн Талуудын 17 дугаар бага хурлын (COP17) хүрээнд 8 дугаар сарын 20-нд зохион байгуулагдсан Тогтвортой Санхүүжилтийн Өндөр Түвшний Форумын үеэр ТХЗ-уудын Санхүүжилтийн Таксономи Хувилбар 2.0-ыг албан ёсоор танилцууллаа. Энэхүү танилцуулга нь үндэсний тогтвортой хөгжлийг дэмжих санхүүгийн систем бүрдүүлэх чиглэлээр хэрэгжүүлж буй ажлуудын томоохон нэг алхам болж байна.

Таксономи гэдэг нь ногоон болон тогтвортой эдийн засгийн үйл ажиллагааг тодорхойлох ангиллын хэрэгсэл бөгөөд бодлого боловсруулагч, санхүүгийн байгууллага, аж ахуйн нэгжүүдэд нийтлэг хэл болж өгөхийн зэрэгцээ ил тод байдлыг бэхжүүлж, ногоон угаалтын эрсдэлийг бууруулдаг. Монгол Улс 2019 онд Үндэсний Ногоон Таксономийг баталснаар дэлхийд таксономи нэвтрүүлсэн анхдагч орнуудын нэг болсон бөгөөд 2023 онд ТХЗ-уудын Санхүүжилтийн Таксономийг баталж, хамрах хүрээгээ зөвхөн ногоон үйл ажиллагаанаас гадна Тогтвортой Хөгжлийн Зорилготой уялдсан байгаль орчин, нийгмийн тэргүүлэх чиглэлүүдийг багтаах хэлбэрээр өргөжүүлсэн юм. Уг таксономийг зээлийн багцууд дээр туршиж, хэрэгжилтийн практик сургамж гаргаж авсны зэрэгцээ олон улсад хүлээн зөвшөөрөгдсөн таксономийн нийтлэг зарчмуудтай тулгаж үнэлсэн нь Хувилбар 2.0-ыг боловсруулах чухал үндэслэл болсон.

Шинэчилсэн Таксономи нь олон улсын таксономиудтай харилцан уялдаатай, нийцлийг хангах үүднээс шинжлэх ухаанд суурилсан шалгуур бүхий Техникийн Шалгуур Үзүүлэлтийн арга зүйг нэвтрүүлж байна. Жагсаалтад суурилсан хандлагаас шилжиж, Хувилбар 2.0 нь дараах гурван үндсэн зарчимд тулгуурласан илүү нарийвчилсан үнэлгээний арга барилыг нэвтрүүлж байна. Эдгээр нь (i) үйл ажиллагаа нь байгаль орчин, эсхүл нийгмийн зорилтод Суурь хувь нэмэр оруулсан байх, (ii) бусад тогтвортой байдлын зорилтод Ноцтой хор учруулахгүй байх , мөн (ii) Нийгмийн хамгааллын Суурь Үзүүлэлтийг хангасан байх тулгуур зарчмууд юм.