LocationsБҰҰДБ және Қазақстан Үкіметі азаматтардың қатысуы арқылы Абай облысының орнықты дамуына жәрдемдеседі
2025 ж. 9 September
Біріккен Ұлттар Ұйымының Даму бағдарламасы (БҰҰДБ) Қазақстан Республикасының Үкіметімен бірлесіп іске асырылатын «Орнықты даму: жаңа өңірлердегі өңірлік айырмашылықтарды еңсеру» өңірлік бағдарламасы шеңберінде Қазақстан өңірлеріндегі жұмыс кездесулерін жалғастыруда. Бағдарламаның мақсаты – көрсетілетін қызметтерге, жұмысқа орналасу мүмкіндіктері мен инфрақұрылымға қол жеткізу бөлігіндегі жергілікті айырмашылықтарды жою, сондай-ақ қоғамдастықтарға орнықты даму мақсаттарына сәйкес олардың даму әлеуетін ашуға көмектесу.
Семей қаласындағы кездесу жергілікті билік органдарының, соның ішінде облыс әкімінің, аудандық әкімдіктердің, мәслихат депутаттарының, сондай-ақ қоғамдық ұйымдардың өкілдерін біріктірді. Қатысушылар өңірді дамытудың басымдықтарын, инклюзивті экономикалық өсу үшін мүмкіндіктерді және болашақ ынтымақтастық бағыттарын талқылады.
«Біз бүгінгі күні экология, жасыл экономика, әлеуметтік қолдау, білім беру, цифрландыру және кәсіпкерлікті дамыту саласында жаңа бастамаларды іске асырып жатырмыз. Бұл тұрғыда БҰҰ Даму бағдарламасының жоспарларымен үндесетін жобалар біз үшін өте маңызды. Биыл өңірде әлеуметтік-экономикалық проблемаларды шешуге, жергілікті атқарушы органдар мен тұрғындар үшін тренингтер өткізуге, ауылдардағы әлеуметтік инфрақұрылымды жаңғыртуға және жастарды жұмыспен қамту мен кәсіпкерлікке тартуға бағытталған бастамаларды қолдау жобалары іске асырылатын болады», – деп атап өтті Абай облысының әкімі Берік Уәли.
2022 жылы құрылған Абай облысы тау-кен, өңдеу, жеңіл және металлургия өнеркәсібі салаларының тар шеңберіне тәуелділікті қоса алғанда, бірқатар құрылымдық сын-қатерлерге тап болуда. Өңірге экономиканы әртараптандыру және жергілікті қоғамдастықтардың мүдделерін ескеретін орнықты даму қажет.
БҰҰДБ мен Қазақстан Үкіметінің бірлескен жобасында жергілікті билік органдары мен қоғамдастықтардың инклюзивті және ашық даму процестерін қалыптастырудағы рөлін күшейтуге ерекше назар аударылады. 2025 жылы жоба аясында Абай облысының төрт ауданында: Аягөз, Жаңасемей, Көкпекті және Мақаншы әкімдіктерінің, қоғамдық кеңестерінің, мәслихаттарының және ҮЕҰ өкілдеріне арналған семинарлар өтті.
«Семей қазақ мәдени руханиятының, ғылымның, білім мен өнердің орталығы ретінде Қазақстан тарихында ерекше орын алады. БҰҰДБ сараптамалық қолдау, тексерілген шешімдер және инвестицияларды жұмылдыруға жәрдемдесу арқылы Абай облысының орнықты дамуына жәрдемдесуге дайын. Жергілікті
өзін-өзі басқару және халық қатысатын бюджет тетіктерін күшейту тұрғындарға жергілікті жерлерде шешім қабылдауға белсенді қатысуға мүмкіндік береді. Бірлескен күш-жігермен біз облыс экономикасының орнықтылығын арттыруға және бүкіл өңір халқының өмір сүру сапасын жақсартуға үлес қоса алатынымызға сенімдімін», – деп атап өтті БҰҰДБ-ның Қазақстандағы Тұрақты өкілі Катаржина Вавьерниа.
Семейдегі кездесу қорытындысы бойынша тараптар экологиялық стандарттарды ескере отырып, инфрақұрылымды жаңғыртуға, қалдықтарды жоюды басқаруға және жергілікті қоғамдастықтың қатысуын кеңейтуге бағытталған пилоттық жобалармен бірлескен жұмысты жалғастыруға келісті.
Абай және Ұлытау облыстарында іске асырылып жатқан пилоттық бастама бүкіл ел бойынша институционалдық дамуды, азаматтарды тартуды және цифрлық шешімдерді үйлестіретін табысты тәсілдерді ауқымды түрде қолдану үшін негіз қалайды. БҰҰДБ бұл процесті дамудың стратегиялық серіктесі ретінде жалғастырады.
