Бүгүн Ош облусунун Кара-Суу районундагы кооз «Беш-Мерген» эс алуу борборунда мамлекеттик органдардын, туризм тармагынын өкүлдөрүн, ишкерлерди, кол өнөрчүлөрдү, эл аралык өнөктөштөрдү, ошондой эле Кыргызстан, Өзбекстан жана Тажикстандан келген коноктордун башын бириктирген «Салам, Ош!» VII Эл аралык туристтик фестивалынын ачылышы өттү.

Фестиваль «Кыргыз Республикасынын Ош аймагында туризмди туруктуу өнүктүрүүнүн 2024–2028-жылдарга каралган программасын» ишке ашыруунун алкагында өткөрүлүүдө. Ал акыркы жылдары Ош облусунун туристтик потенциалын илгерилетүүдө жана Фергана өрөөнүндөгү чек ара аралык кызматташтыкты өнүктүрүүдө негизги аймактык аянтчалардын бирине айланды.

«Мындай иш-чаралардын өткөрүлүшү инфраструктураны өнүктүрүүгө, инвестиция тартууга, маданий мурастарды жайылтууга жана аймактын туруктуу социалдык-экономикалык өнүгүүсүнө өбөлгө түзөт. Фестивалдын бардык өнөктөштөрүнө жана уюштуруучуларына өзгөчө ыраазычылык билдиргим келет. Дүйнөлүк банкка, БУУӨПкө, Соода-өнөр жай палатасына, Туроператорлор ассоциациясына терең ыраазычылык билдирем…», - деп белгиледи Кыргыз Республикасынын Президентинин Ош облусундагы ыйгарым укуктуу өкүлү Аманкан Батырбекович Кенжебаев.

2024-жылдан тарта фестивалдын форматы кеңейтилип, жаңы туристтик багыттарды илгерилетүү жана туризмди өнүктүрүүгө жергиликтүү жамааттарды тартуу максатында облустун ар кайсы райондоруна көчүрүлгөн. Буга чейин Алай жана Ноокат райондорунда өткөрүлгөн иш-чаралардан кийин, 2026-жылдагы фестиваль Кара-Суу районунда уюштурулуп, аймактын бай жаратылыш, маданий жана экономикалык потенциалын көрсөттү.

Тоо этегиндеги кооз жерде жайгашкан «Беш-Мерген» эс алуу борбору Ош облусунун экологиялык, укмуштуу окуялуу жана үй-бүлөлүк туризмди өнүктүрүү боюнча кеңири мүмкүнчүлүктөрүн чагылдырган фестивалдын символикалык орду болуп калды.

Фестивалдын алкагында туристтик каттамдар, кол өнөрчүлүк буюмдары, гастрономиялык каада-салттар, маданий программалар, ошондой эле туризм чөйрөсүндөгү чакан жана орто бизнести өнүктүрүү мүмкүнчүлүктөрү сунушталды. Ишкер аялдарды, жаштарды жана жергиликтүү өндүрүүчүлөрдү колдоого өзгөчө көңүл бурулду.

Катышуучулар мындай иш-чаралар аймактын туристтик дараметин илгерилетүүгө гана эмес, Кыргызстан, Өзбекстан жана Тажикстандын чектеш аймактарынын ортосундагы экономикалык жана гуманитардык байланыштарды чыңдоого да салым кошорун белгилешти. Мурунку фестивалдардын жыйынтыгы боюнча туристтердин агымынын өсүшү, анын ичинде Өзбекстан Республикасынан келген коноктордун санынын көбөйүшү катталган.

БУУӨП туруктуу туризмди жана ишкердикти өнүктүрүүгө, жергиликтүү жамааттардын экономикалык мүмкүнчүлүктөрүн кеңейтүүгө, ошондой эле Кыргыз Республикасы менен Өзбекстан Республикасынын ортосундагы соода-экономикалык жана маданий-гуманитардык кызматташтыкты чыңдоого багытталган демилгелерди колдойт.

Бул демилгелер Фергана өрөөнүндөгү өлкөлөр ортосунда аймактар аралык кызматташтыкты чыңдоо, экономикалык туруктуулукту өнүктүрүү жана конструктивдүү өз ара аракеттенүү мүмкүнчүлүктөрүн кеңейтүү максатында БУУнун Тынчтыкты орнотуу фондунун жана Финляндия Өкмөтүнүн жардамы менен ишке ашырылууда. Аталган демилгелерди БУУӨП, Эл аралык миграция уюму жана БУУнун Баңгизаттар жана кылмыштуулук боюнча башкармалыгы биргеликте ишке ашырышат.

«Салам, Ош – 2026!» фестивалы Ош облусунун Борбордук Азиядагы маданий, экологиялык жана укмуштуу окуялуу туризмдин келечектүү борборлорунун бири катары жогорку потенциалын, ошондой эле туризмдин аймактагы жамааттар менен өлкөлөрдүн ортосунда туруктуу өнүгүү, иш менен камсыз кылуу жана өз ара ишенимди чыңдоо куралы катары маанилүүлүгүн дагы бир жолу далилдеди.