Біріккен Ұлттар Ұйымының Даму бағдарламасының (БҰҰДБ) Қазақстандағы Тұрақты өкілі Катаржина Вавьерниа Қазақстан Республикасының Экология және табиғи ресурстар министрі Ерлан Нысанбаевпен кездесті. Кездесудің мақсаты климаттың өзгеруін азайту, биоәртүрлілікті сақтау және тұрақты даму бастамалары бойынша одан әрі ынтымақтастықты талқылау болды.

Катаржина Вавьерниа Қазақстанның 2060 жылға қарай көміртегі бейтараптығына қол жеткізу ниетін жоғары бағалады. Еліміздің энергетика секторын көміртексіздандыру арқылы жасыл экономикаға көшуі БҰҰДБ 2021-2025 жылдарға арналған Елдік бағдарламасына сәйкес келіп, Қазақстанның климатқа төзімді және төмен көміртекті экономикалық өсуін қолдауға бағытталған тараптардың ортақ мақсаттарын көрсетеді.

Кездесу барысында климаттық саясатты жетілдіруге, парниктік газдар шығарындыларына мониторингті жақсартуға және елдің биологиялық әртүрлілікті сақтау жөніндегі күш-жігерін ілгерілетуге бағытталған БҰҰДБ мен Министрлік арасында жүзеге асырылып жатқан бірлескен жобалар талқыланды. Тараптар экологиялық дәліздер мен ерекше қорғалатын табиғи аумақтарды құруда айтарлықтай ілгерілеушілікке қол жеткізілгенін атап өтті, бұл Қазақстанның бірегей экожүйелерін сақтауға өзара ниеттілігін көрсетеді.

Сонымен қатар, кездесу барысында тараптар Тұран жолбарыстарының популяциясын қалпына келтіру және ерекше қорғалатын табиғи аумақтарды басқаруда Қазақстанның техникалық әлеуетін нығайту және орман өрттері сияқты экологиялық дағдарыстарға қарсы тұру сияқты жобалар бойынша одан әрі ынтымақтастық мүмкіндіктерін қарастырды.