پێشبینی دەکرێت لە کۆی پێنج کەس لەو کەسانەی لە ناوچەیەکدا دەژین کە کەوتبووە بەر کاریگەری ململانێ، یەك کەسیان  جۆرێک لە نەخۆشى دەروونی هەبێت. لەکاتێکدا عێراق وڵاتێکه گیرۆدەی دەیان ساڵ لە ململانێ بووە، ماوەیەکی زۆری پێچووە تا کاتی ئەوە بێت تەندروستی دەروونی بکرێتە چەقی بایەخ پێدان.

بەرنامەی نەتەوە یەكگرتووەكان بۆ پەرەپێدان لە عێراق بەهاوکاری دەستەی ڕاوێژکاری ئاسایشی نەتەوەیی و وەزارەتی تەندروستی وڕێکخراوی تەندروستی جیهانی بەم دواییە قۆناغی دووەمی ڕاهێنانی تایبەت بە تەندروستی دەروونی وپشتیوانی دەروونی وکۆمەڵایەتی لەبەغدا بۆ 25 نوێنەری چەندین وەزارەتی عێراق تەواوکرد کە بەشێکی ئەو تیمە یەکخراوە پێکدەهێنن کە لە نزیکەوە کار لەگەڵ ئەو خانەوادە عێراقییانە دەکەن کە ئاوارەی کەمپی هۆل بوون. 

یەکەم دانیشتنی ڕاهێنانەکە لە مانگی تشرینی دووەمى ساڵی ڕابردوودا بەڕێوەچوو. لەو کاتەوە، بەشداربووان ڕاسپێردراون بۆ هەڵسەنگاندنی پێداویستییە دەروونییەکانی خێزانە ئاوارەنێوخۆییەکان کە لە کەمپی هۆلەوە دەگەڕێنەوە بۆ ناوەندی ڕاهێنانەوەی جەدەعەی 1 لە نەینەوا و ئامادەیان دەکەن بۆ گەڕانەوەیەکی ئاسان وبێ گرفت بۆ ناوچەکانی زێدی خۆیان وپرۆسەی یەکخستنەوەیان لەو ناوچانەدا.

قۆناغی دووەمی ڕاهێنانەکە چەند دانیشتنێکی لەخۆگرت کە تایبەت بوون بەو وانانەی لە ئەزموونی خۆیانەوە لەگەڵ خێزانەکانی ناوەندی ڕاهێنانەوەی جەدەعە فێریان بوون و چۆنێتیی چارەسەرکردنى ئەو ئاستەنگانە و هەنگاونان بەرەو داهاتوو.