Locations«Климат күтпейді» жазғы климаттық лагері: Қазақстан жастары орнықты болашақ үшін бірігуде
2025 ж. 14 July
2025 жылғы 10-14 шілде аралығында Зерендінің көркем жерінде «Климат күтпейді» жазғы климаттық лагері өтті — бұл Қазақстанның түкпір-түкпірінен келген 40-тан астам оқушы мен 20 мұғалімді біріктірген білім беру бастамасы. Лагерь БҰҰДБ Қазақстандағы өкілдігі, Қазақстан Республикасының Оқу-ағарту министрлігі, Су ресурстары және ирригация министрлігі, Экология және табиғи ресурстар министрлігі және Ақмола облысының Төтенше жағдайлар департаментінің қолдауымен ұйымдастырылды. Ол климаттық білім беру саласында білім, идея және шабыт алмасу алаңы болды.
Лагерьдің мақсаты — оқушылардың климаттың өзгеруіне саналы көзқарасын қалыптастыру, көшбасшылық қасиеттер мен жобалық ойлауды интерактивті оқыту, топтық жұмыс және зерттеу арқылы дамыту. Төрт күн ішінде қатысушылар биоалуантүрлілік, климаттық осалдық, энергия тиімділігі және суды үнемдеу тақырыптарын зерттеді.
Лагерьдің ресми ашылуы 11 шілдеде мемлекеттік органдар мен халықаралық ұйымдардың өкілдерінің қатысуымен өтті. БҰҰДБ Қазақстандағы Тұрақты өкілінің міндетін атқарушы Сухроб Ходжиматов ашылу салтанатында келесідей атап өтті:
«Климат — бұл жалғыз күресе алмайтын мәселе. Сондықтан біз экологиялық білім беруге, көшбасшылық дағдыларды дамытуға және оқушылар арасында жобалық-зерттеу жұмыстарына ерекше назар аударамыз. Сіздер — ертеңгі климат көшбасшыларысыздар.»
Лагерь бағдарламасына дәрістер, шеберлік сабақтары, тренингтер, квесттер және шығармашылық тапсырмалар кірді. Қатысушылар өздерінің климаттық жобаларын таныстырып, тәжірибе алмасты. Ерекше назар БҰҰДБ әзірлеген және балалар мен жасөспірімдерге климат туралы түсінікті тілде айтуға көмектесетін жаңартылған оқу-әдістемелік жинақ — «Климаттық қобдиша» жобасына аударылды.
Ең жарқын сәттердің бірі Су күні болды, оны ҚР Су ресурстары және ирригация министрлігінің Су ресурстары жөніндегі ақпараттық-талдау орталығы ұйымдастырды. Қатысушылар «Соңғы тамшыны іздеу» квестін өтіп, «Менің қамқорлық тамшым» бейнероликтер байқауына қатысып, суды үнемдеудің маңыздылығын көрсететін арт-инсталляциялар жасады.
Үшінші күн климаттық осалдық пен климаттың өзгеруіне бейімделу тақырыбына арналды. Бағдарламада «Климат деген не және ол неге өзгереді?» атты интерактивті дәріс, климаттық қауіп-қатер картасын жасау бойынша топтық жұмыс, климаттық төтенше жағдайлар кезіндегі әрекеттер бойынша тренинг және энергия тиімділігі мен үнемдеу мәселелеріне арналған практикалық сессия болды. Күн «Климатпен не болды? Қайда? Қашан?» атты интеллектуалды турнирмен аяқталды, онда қатысушылар экологиялық тақырыптағы командалық ойынға бірікті.
Бағдарламаның форматы теория мен тәжірибені біріктіріп, оқушылар мен мұғалімдердің назарын бірдей тартты. Мұғалімдер үшін бұл климат тақырыбында оқытудың жаңа тәсілдерін меңгеруге мүмкіндік болды. Бір биология пәнінің мұғалімі сабақтарын заманауи әрі тартымды ету үшін оқыту тәсілдерін қайта қарауды жоспарлап отырғанын айтты.
Лагерь салтанатты шарамен аяқталды: қатысушылар сертификаттар алып, әсерлерімен бөлісті және жаңа біліммен, пікірлес командамен және «климат күтпейді — әрекет ету қажет» деген түсінікпен үйлеріне оралды.
