Париж келісімі бойынша қабылданған ұлттық климаттық басымдықтарды және халықаралық міндеттемелерді іске асыру шеңберінде Қазақстан Ұлттық бейімдеу жоспарын (ҰБЖ) әзірлеп жатыр. Ұлттық контекске бейімделген Климаттық тәуекелдерді бағалау әдіснамасын әзірлеу - осы жолдағы ең маңызды кезең  болды. Бұл құрал мемлекеттік органдар, жергілікті билік, бизнес және қоғамдастықтар деңгейінде негізделген шешімдер қабылдай отырып, негізгі секторлар мен өңірлерде климаттық тәуекелдерді анықтау, талдау мен басқаруға арналған құрылымдалған негіз ұсынады.

Әдіснама бағалаудың сапалық та, сандық та әдістерін пайдалануды көздейтін жүйелі, деректерге бағдарланған және секторлық тәсілге негізделген. Оған халықаралық танылған негіздемелік құжаттар мен стандарттар негіз болды, соның ішінде: ⁠КӨХСТ алтыншы бағалау баяндамасы (IPCC AR6), GIZ климаттық тәуекелдерді бағалау жөніндегі нұсқаулықтары, UNDRR климаттың өзгеруі контекстінде тәуекелдерді кешенді бағалау және жоспарлау бойынша техникалық басшылығы, ⁠ISO 14091:2021 «Климаттың өзгеруіне бейімделу - осалдықты, салдарлар мен тәуекелдерді бағалау жөніндегі нұсқаулық», ⁠ISO 31000:2018 «Тәуекел менеджменті - Басшылық қағидаттары».

Әдіснамада негізгі қағидаттары бар негіздемелік модельден бастап практикалық ұсынымдар мен бағалау құралдарына дейін кезең-кезеңмен іске асыру көзделеді. Қолданылатын тәсілдер әмбебап сипатта және оларды әртүрлі секторларға бейімдеуге болады. Су ресурстары, ауыл және орман шаруашылығы үшін, сондай-ақ зілзалалар қатерін азайту үшін секторлық құралдар қосымша көзделген (СРБ/DRR).