ტექნოლოგია ადამიანისთვის 

ფერმერთა აპლიკაცია GECSA იმ ციფრული ხელსაწყოების რიცხვშია, რომლებიც გაეროს განვითარების პროგრამის (UNDP) მხარდაჭერით შეიქმნა, რათა ტექნოლოგიური პროგრესი უშუალოდ ადამიანის სამსახურში ჩააყენოს.

ამინდის პროგნოზი, ფერმერთა ხელშეწყობა, სტუდენტებისთვის სწავლის ახალი გზების შეთავაზება თუ კლიმატური კატასტროფების მიმართ მზაობის გაზრდა. ეს განსხვავებული ციფრული ხელსაწყოები ერთ საერთო მიზანს ემსახურება: ინოვაციები გახდეს პრაქტიკული, ხელმისაწვდომი და მარტივად გამოსაყენებელი ყოველდღიურ ცხოვრებაში.

„ტექნოლოგია მხოლოდ იმ შემთხვევაში იძლევა რეალურ შედეგს, თუ ადამიანებამდე აღწევს და არსებული გამოწვევების დაძლევაში ეხმარება. იქნება ეს მევენახე თუ სტუდენტი, ციფრულ გადაწყვეტილებებს მათთვის ახალი შესაძლებლობების შექმნა შეუძლია. ჩვენი ამოცანაა, ამ შესაძლებლობების ხელმისაწვდომობა უზრუნველვყოთ და საქართველოს უფრო მწვანე, ინკლუზიურ და მდგრად მომავლს შევუწყოთ ხელი“, - აცხადებს დაგლას უები, UNDP-ის მუდმივი წარმომადგენელი საქართველოში.

UNDP აქტიურად თანამშრომლობს სახელმწიფო უწყებებთან, ადგილობრივ თემებსა და საერთაშორისო პარტნიორებთან, რათა ეს ხედვა რეალობად აქციოს.

თანამედროვე ცოდნა თანამედროვე სოფლისთვის:

შვეიცარიის მხარდაჭერით, UNDP ხელს უწყობს პროფესიული განათლებისა და გადამზადების სისტემის მოდერნიზებას, განსაკუთრებით სოფლის მეურნეობასთან დაკავშირებულ პროფესიებში. 

ამ დახმარების ფარგლებში, სწავლების თანამედროვე მიდგომები და ციფრული ხელსაწყოები კოლეჯებში, სკოლებსა და სასწავლო ცენტრებში დაინერგა.

• შემუშავდა ელექტრონული სწავლების ცხრა მოდული, მათ შორის ნიადაგის მართვისა და მავნებლებთან ბრძოლის საკითხებში.
• 64 პროფესიულ კოლეჯში დაინერგა თვითშეფასების ახალი, 360-გრადუსიანი სისტემა, რომელსაც ციფრული პლატფორმა უზრუნველყოფს. აღნიშნული სისტემა სტუდენტებს, მასწავლებლებსა და დამსაქმებლებს საშუალებას აძლევს, მონაწილეობა მიიღონ სწავლების ხარისხის შეფასებაში.
• 2025 წლისთვის, ციფრული სწავლების ამ ინსტრუმენტებით 25,000-ზე მეტმა მომხმარებელმა ისარგებლა.

იხილეთ: პროფესიული განათლებისა და გადამზადების ხელშეწყობა

კლიმატის ცვლილებასთან ადაპტაცია - ერთი ნაბიჯით წინ:

კლიმატის მწვანე ფონდისა (GCF) და შვეიცარიისა და საქართველოს მთავრობების მხარდაჭერით, UNDP ხელს უწყობს თანამედროვე ხელსაწყოების შექმნას კლიმატის ცვლილების მონიტორინგისა და პროგნოზირებისთვის.

• საქართველოს მთელ ტერიტორიაზე დამონტაჟდა 150 სადგურისგან შემდგარი ქსელი, რომელიც 94 მეტეოროლოგიურ, 43 ჰიდრომეტეოროლოგიურ და 13 აგრომეტეოროლოგიურ სადგურს მოიცავს. მიღებული ინფორმაცია გამოიყენება ამინდის საჯარო პორტალის, METEO.GOV.GE-ის მონაცემებისთვის.
• ფოთში დამონტაჟდა მაღალტექნოლოგიური აეროლოგიური სადგური, რომელიც ატმოსფეროს ვერტიკალური ზონდირების მეშვეობით, მაღალი ხარისხის კლიმატურ ინფორმაციას აგროვებს.
• 11 მეწყერსაშიშ ლოკაციაზე დამონტაჟდა გეოლოგიური მონიტორინგის სადგურები.
• ფინეთის მეტეოროლოგიურ ინსტიტუტთან თანამშრომლობით, განახლდა საქართველოს ჰიდრომეტეოროლოგიური სამსახურების საინფორმაციო-საკომუნიკაციო (ICT) სისტემები. მალე დასრულდება მობილური აპლიკაციების, SartMet-ისა და SmartAlert-ის შექმნა, რის შედეგად ამინდის პროგნოზირება და კლიმატური ინფორმაცია კიდევ უფრო სანდო და ხელმისაწვდომი გახდება.

იხილეთ: კლიმატის ცვლილებით გამოწვეული კატასტროფების შემცირება საქართველოში

სუფთა ჰაერი ყველასთვის:

ევროკავშირის მხარდაჭერით, UNDP ხელს უწყობს საქართველოში ჰაერის ხარისხის მონიტორინგის ქსელის გაფართოებას 10 თანამედროვე ავტომატური სადგურის დამატებით. 

მაღალტექნოლოგიური სადგურები რეალურ დროში ზომავენ ჰაერის დაბინძურების დონეს, ხოლო მიღებულ მონაცემებს ავტომატურად გადასცემენ ჰაერის ხარისხის საჯარო პორტალს, AIR.GOV.GE.

ეს მნიშვნელოვანი საქმიანობა ჯანმრთელობის მსოფლიო ორგანიზაციასთან (WHO), გაეროს ევროპის ეკონომიკურ კომისიასთან (UNECE) და ავსტრიის გარემოს დაცვის სააგენტოსთან პარტნიორობით ხორციელდება.

იხილეთ: გაეროს ერთობლივი პროგრამა „სუფთა ჰაერი ადამიანის ჯანმრთელობისთვის“

მწვანე რეფორმატორთა თაობა:

ევროკავშირისა და დანიის მხარდაჭერით, UNDP ხელს უწყობს საქართველოს მწვანე განვითარებასა და ეკონომიკაში ცირკულარული მიდგომების დანერგვას. ახალგაზრდების დაინტერესება, ჩართულობა და მათი ინიციატივების მხარდაჭერა ამ ინიციატივის საკვანძო ნაწილია. 

• ჩვენმა ციფრულმა თამაშმა „ჩომპო-კალიფსი“ საფუძველი ჩაუყარა ახალგაზრდულ კამპანიას, რომელშიც უამრავი სკოლის მოსწავლე და სტუდენტი ჩაერთო. დღეს ადგილობრივი ახალგაზრდული ინიციატივები საქართველოს ყველა კუთხეში ხორციელდება და ნარჩენების გონივრულ მართვას გვასწავლის.
• ხობისა და ფოთის მუნიციპალიტეტებში, ოცდაათი ახალგაზრდა ციფრული ელჩი ახალ ტექნოლოგიებს ეუფლება. მათი მიზანია მარტივად  გამოსაყენებელი, პრაქტიკული ხელსაწყოებს შექმნა, რომლებიც მწვანე განვითარებას წაადგება.

იხილეთ: გაეროს ერთობლივი პროგრამა ცირკულარული ეკონომიკისთვის და UNDP-ის რეგიონული პროგრამა „მწვანე მომავალი, უფლებები და სტაბილურობა“

საკლასო ოთახებიდან ხეხილის ბაღებამდე, ციფრულ ტექნოლოგიას შეუძლია უკეთესებისკენ შეცვალოს ჩვენი ცხოვრება. მთავარია, ზუსტად ვიცოდეთ, თუ როგორ გამოვიყენოთ ეს მძლავრი იარაღი და როგორ მივიტანოთ მიღწეული შედეგები თითოეულ ადამიანამდე.

დავითისთვის, თემურისთვის, ნატალიასთვის და ბევრი სხვა მცირე ფერმერისთვის, კლიმატური აპლიკაცია გაცილებით მეტია, ვიდრე ტელეფონის ეკრანზე გამოსახული მონაცემები. მზარდი გაურკვევლობის ეპოქაში, GECSA-ს მსგავსი პლატფორმები მათი შანსია, თავისი მრავალწლიანი შრომა დაიცვან, დროს ფეხი აუწყონ და კლიმატის ცვლილებას შეიარაღებულები შეხვდნენ.

ციფრული ტექნოლოგია მეტია, ვიდრე ხელსაწყო. ეს არის გზა მომავლისკენ, სადაც არავინ დარჩება განვითარების მიღმა.    

დამატებითი ინფორმაცია

UNDP ხელს უწყობს კლიმატგონივრული საზოგადოების მშენებლობას საქართველოში, რათა ადამიანები, ეკონომიკა და ინფრასტრუქტურა მეტად იყონ დაცული კლიმატის ცვლილებით გამოწვეული კატასტროფებისა და ეკონომიკური შოკებისგან. 

74 მილიონი აშშ დოლარის ღირებულების კლიმატური პროგრამა კლიმატის მწვანე ფონდის (GCF), საქართველოს მთავრობის და შვედეთისა და შვეიცარიის დაფინანსებით ხორციელდება. 

პროგრამის განხორციელებაში ჩართულები არიან საქართველოს საჯარო და სამოქალაქო სექტორები, აკადემიური ინსტიტუტები, საგანმანათლებლო დაწესებულებები, საერთაშორისო პარტნიორები და ადგილობრივი მოსახლეობა.

დამატებითი ინფორმაცია იხილეთ აქ.