LocationsАт-Башы районунун Ак-Жар айылынын башчысы Сымбат Аттокурова коомдук лидерлик менен үй-бүлөлүк бизнесин ийгиликтүү айкалыштырып келет. Ал «Ат-Башы курут» бренди алдында улуттук салттуу курутту өндүрүп, элдик рецепттерди заманбап өндүрүш, таңгактоо жана маркетинг ыкмалары менен айкалыштырууда.
Сымбат Аттокурова: жергиликтүү лидерликтен аялдардын ишкерлигин өнүктүрүүгө карай
2026-ж., 15-October
Бүгүнкү күндө анын продукциясынын ассортиментинде табигый бал, малина, карагат жана чычырканак кошулган ар түрдүү даамдагы куруттар бар. Сымбат продукцияны таңгактоого өзгөчө көңүл бурат. Заманбап таңгактоо продукциянын сапатын сактоого, сактоо мөөнөтүн узартууга жана салттуу азыкты заманбап керектөөчүлөр үчүн дагы жагымдуу кылууга жардам берет.
Өндүрүш азырынча үй-бүлөлүк деңгээлде жүргүзүлүп, массалык чыгарууга багытталган эмес. Курут эки өзүнүн уйунан алынган сүттөн даярдалат, бул өндүрүштүн бардык баскычтарында сапатты көзөмөлдөөгө мүмкүндүк берет. Продукциялар негизинен алдын ала берилген буйрутмалар аркылуу, ошондой эле аймактык жарманкелерде жана көргөзмөлөрдө сатылат. Үй-бүлөлүк бизнести өнүктүрүүдө Сымбатка кызы көмөк көрсөтүп, «Ат-Башы курут» брендин жаңы рынокторго алып чыгуу максатын бөлүшөт.
Сымбат үчүн жеке ишкерликти өнүктүрүү жергиликтүү коомчулук менен болгон ишмердүүлүгүнүн уландысы болуп калды. Ак-Жар айылынын башчысы катары ал БУУӨПтүн Аялдардын креативдүү лабораторияларын түзүү демилгесин активдүү колдоп, Ат-Башы районундагы аялдарды программанын мүмкүнчүлүктөрү тууралуу маалымдап, окууларга катышууга үндөгөн.
Ошол эле учурда Сымбат өзү да лабораториянын катышуучусу болууну чечкен. Ишинин көптүгүнө карабастан, ал брендинг, таңгактоо, маркетинг, продукцияны илгерилетүү жана бизнести өнүктүрүү боюнча окуулардан өткөн. Алган билимдеринин аркасында таңгактоону жакшыртып, жаңы даамдарды кошуу менен ассортиментин кеңейтип, өз брендин өнүктүрүү мүмкүнчүлүктөрүнө жаңы көз караш менен карай баштаган.
Ошентип, Аялдардын креативдүү лабораториясына катышуу Сымбат үчүн жаңы билим алуунун гана эмес, үй-бүлөлүк бизнести өнүктүрүүнүн практикалык куралына айланган. Салттуу продукт заманбап таңгакка жана жаңы сунуштоо формасына ээ болуп, ишкер айым өз продукциясын жайылтуу жана өсүү үчүн жаңы мүмкүнчүлүктөрдү табуу боюнча зарыл билимдерге ээ болгон.
Бүгүнкү күндө үй-бүлөнүн жалпы айлык кирешеси 200–250 миң сомго жакын болуп, бул үй-бүлөлүк өндүрүш алардын негизги киреше булактарынын бири болуп саналат. Ошол эле учурда Сымбат бизнести мындан ары кеңейтүүнү үй-бүлөнүн каржылык туруктуулугун бекемдөө гана эмес, өз айылындагы аялдар үчүн жаңы жумуш орундарын түзүү мүмкүнчүлүгү катары да карайт.
Анын пландарында өндүрүш көлөмүн көбөйтүү, сатууну арттыруу, «Ат-Башы курут» брендин мындан ары өнүктүрүү жана жаңы рынокторго чыгуу бар.
Сымбаттын окуясы ишкерлик көндүмдөрүн өнүктүрүү аялдарга салттуу өнүмдөрдү жана билимдерди атаандаштыкка жөндөмдүү бизнес-моделдерге айландырууга кандайча жардам берерин көрсөтөт. Анын мисалында ишкерлик коомдук лидерлик менен айкалышат: өзүнүн ишин өнүктүрүү менен бирге ал жамаатындагы башка аялдарды колдоп, билим алуу жана жаңы ыкмаларды өздөштүрүүгө даяр болуу бизнес үчүн жаңы мүмкүнчүлүктөрдү ачарын жеке үлгүсү аркылуу көрсөтүүдө.
Сымбат Аттокурованын окуясы БУУӨПтүн Аялдардын креативдүү лабораторияларын түзүү боюнча демилгесинин бир бөлүгү болуп саналат. Бул демилге айыл жергесиндеги аялдарга ишкерлик көндүмдөрүн өнүктүрүүгө, өз ишин түзүүгө жана кеңейтүүгө көмөк көрсөтөт. Демилге БУУӨП тарабынан мамлекеттик органдар жана жергиликтүү өз алдынча башкаруу органдары менен өнөктөштүктө ишке ашырылып, Кыргыз Республикасынын 2030-жылга чейинки Улуттук өнүгүү программасынын адамдык капиталды өнүктүрүү, аялдардын ишкердиги, креативдүү экономика жана аймактык өнүгүү багыттарындагы артыкчылыктарына салым кошууда.
Нарын облусунда БУУӨПтүн колдоосу менен Ак-Жар, Кызарт жана Кочкор айылдарында үч Аялдардын креативдүү лабораториясы ачылган. Демилге ишке ашырылган мезгилде алардын резиденттери болуп 313 аял катталып, дагы 1 589 кыз-келин Women Creative Labs коомчулугуна кошулган. Катышуучулар ишкерлик, финансылык сабаттуулук, маркетинг жана креативдүү экономиканы өнүктүрүү боюнча 83төн ашуун билим берүү иш-чараларына катышуу мүмкүнчүлүгүнө ээ болушкан.
