Locations"Çdo plumb ka një objektiv!" Festoni me zemër jo me armë” - fushatë e MPB-së dhe UNDP-së
October 6, 2022
"Çdo plumb ka një objektiv!" Festoni me zemër, jo me armë”, është sllogani i fushatës së re për ndërgjegjësimin e publikut për rreziqet që vijnë nga mbajtja dhe keqpërdorimi i armëve të vogla dhe të lehta. Aktiviteti zbatohet nga Ministria e punëve të brendshme në bashkëpunim me Programin për zhvillim të Kombeve të Bashkuara (UNDP).
Qëllimi kryesor i fushatës është të paralajmërojë për pasojat e përdorimit të paautorizuar të armëve të vogla dhe të lehta, veçanërisht gjatë festave, si dhe të zvogëlojë numrin e incidenteve që lidhen me të shtënat. Mesazhi i dërguar qytetarëve është se edhe një plumb endacak duhet të përfundojë diku dhe ekziston reziku të rrezikohet jeta e dikujt.
“Lufta kundër tregtisë ilegale të armëve është prioritet strategjik i Ministrisë së punëve të brendshme. Si rezultat i aktiviteteve të planifikuara të intensifikuara në këtë fushë, rezultate veçanërisht domethënëse janë arritur vitin e kaluar, si me rritjen e numrit të krimeve të zbuluara, ashtu edhe me rritjen e sasisë së përgjithshme të armëve, municioneve dhe lëndëve shpërthyese të sekuestruara. Paralelisht me këtë, po punohet në mënyrë aktive për ngritjen e vetëdijes publike për rreziqet nga keqpërdorimi i armëve të zjarrit. Konkretisht, pjesëmarrja e partneritetit në këtë fushatë së bashku me UNDP-në tregon edhe një herë vendosmërinë tonë, krahas veprimit represiv, që të vazhdojmë të punojmë në vazhdimësi në fushën e parandalimit, në komunikim të drejtpërdrejtë me qytetarët, mbi të gjitha në komunitetet lokale”, deklaroi ministri i punëve të brendshme, Oliver Spasovski.
Ai theksoi se gjatë vitit të kaluar, deri në fund të shtatorit, policia ka regjistruar 14 raste të keqpërdorimit të armëve gjatë festave dhe festimeve dhe të gjitha janë zgjidhur penalisht.
Fushata e re në të njëjtën kohë do të zbatohet në Maqedoninë e Veriut dhe Kosovë[1] në suaza të projektit “Qasja institucionale e integruar ndërkufitare në luftën kundër tregtisë ilegale të armëve dhe armëve të vogla dhe të lehta”. Nëpërmjet aktiviteteve dhe eventeve të ndryshme, qytetarët do të inkurajohen të raportojnë për të shtëna të paautorizuara, por do të punohet edhe për forcimin e bashkëpunimit ndërmjet institucioneve, veçanërisht në rajonet kufitare, për të luftuar në mënyrë efikase tregtinë e paligjshme të armëve.
“Do të arrijmë të reduktojmë numrin e incidenteve të shkaktuara nga armët e zjarrit vetëm nëse të gjithë së bashku punojmë për të arritur këtë qëllim. Qytetarët duhet të jenë të vetëdijshëm se ata janë aktorët kyç të kësaj historie dhe se duhet të festojnë “me zemër, por jo me armë”, pra të mos i marrin armët gjatë ahengjeve. Siç thotë sllogani i fushatës “çdo plumb e ka një shënjestër”, madje edhe ata që gjuhen në momente të lumtura, pa synim për të lënduar dikend, mund të marrin jetën e njeriut. Mu për këtë, UNDP-ja është e përkushtuar për ndërtimin e komuniteteve të sigurta përmes rritjes së vetëdijes së qytetarëve dhe bashkëpunimit të vazhdueshëm me MPB-në dhe partnerët tjerë kombëtar”, tha Sanja Bojaniq, zëvendëse e përfaqësueses së përhershme të UNDP-së.
Në aktivitetin e sotëm u shfaq edhe një ekspozitë me titull "Po sikur...?", e cila përmbante tituj nga raportet e mediave për incidentet e shkaktuara nga plumbat endacakë. Ideja e ekspozitës është të pyesim veten se sa lehtë i tejkalojmë këto lajme, pa pyetur veten "Po sikur të goditet njeri?". Qëllimi është të ndryshohet ky perceptim dhe të inkurajohet raportimi dhe dënimi i çdo gjuajtjeje të paautorizuar.
Fushata "Çdo plumb ka një objektiv!" Festoni me zemër, jo me armë" financohet nga qeveritë e RS së Gjermanisë, Mbretërisë së Bashkuar, Suedisë, Francës, Holandës dhe Norvegjisë nëpërmjet Fondit të mirëbesimit multipartner dhe mbështetet nga Bashkimi Evropian.
